राजविराज । रामराजा स्वास्थ्य विज्ञान प्रतिष्ठान निर्माणको माग गर्दै आन्दोलनरत सप्तरी युथ नेपालका पदाधिकारीले शनिबार कानुन, न्याय तथा संसदीय व्यवस्था मन्त्री धनराज गुरुङसँग भेटघाट गरेका छन् ।
बिभिन्न कार्यक्रममा सरिक हुन आएका मन्त्री गुरुङसँग रामराजा स्वास्थ्य विज्ञान प्रतिष्ठान निर्माणको सन्दर्भमा कुराकानी गरेको युथ नेपालका पदाधिकारीले बताएका छन् ।
भेटका क्रममा मन्त्री गुरुङले प्रतिष्ठानको विधेयक आउने संसदको अधिवेसनबाट पारित गर्ने बताएको सप्तरी युथ नेपालका कार्यबाहक अध्यक्ष मोहन कुमार यादवले जानकारी दिए ।
‘मन्त्रीज्यूले स्वास्थ्य मन्त्रालयले यसको विधेयक तयार भइसकेको र म आफैं विधेयक समितिको अध्यक्ष रहेकाले चाँडै मिलाएर संसदबाट पारित गराउने प्रतिबद्धता जनाउनुभएको छ’ यादवले भने ।
केहि दिन अगाडि यो विधेयकको बिषयमा छलफल भएपनि स्वास्थ्य मन्त्री बैठकमा सहभागिता जनाउन विदेश गएका कारण हुन सकेन्’ मन्त्री गुरुङले भने, ‘अब चाँडै विधेयक संसदबाट पारित गराई काम अघि बढाइनेछ ।’
सप्तरी युथ नेपालको आन्दोलन परिचालन समिति संयोजक सत्येन्द्र यादवले मन्त्रीले आश्वासन दिएपनि आफूहरुले सरकारलाई दवाव नियमित दिइरहने बताए । उनले घोषित आन्दोलनका कार्यक्रमहरु यथावत रहेको बताए ।
