राजविराज । राजविराजमा भव्यतापूर्वक जगन्नाथ रथयात्रा निकालिएको छ । शनिबार राजविराजस्थित कृष्ण मन्दिर अगाडिबाट निकालिएको रथयात्रामा उल्लेख्य सहभागिता थियो ।
कृष्ण मन्दिरबाट निकालिएको रथयात्रा जनआन्दोलन चोक पुगी राममन्दिर हुँदै गजेन्द्र चोक, गजेन्द्र चोकदेखि भगवती मन्दिर हुँदै अदालत रोड, रुपनी बस स्टेन्डसहित कंचनपुर रोड हुँदै राजदेवी चोक, तेतरी गाछीसम्म पुगेको थियो ।
तेतरी गाछी चोकबाट पुनः बजार परिक्रमा गरी कृष्ण मन्दिरमै गएर रथयात्राको समापन गरिएको छ ।
यो रथयात्रामा महिला, पुरुषदेखि बालबालिका र बृद्धबृद्धासम्मले सहभागिता जनाएका छन् । झाँकी, बाजागाजासहित निकालिएको रथयात्राका सहभागीले ‘हरे कृष्ण, हरे कृष्ण’ उच्चारण गर्दै नाचेका थिए ।
सहभागीमध्ये धेरै पुरुष धोति लगाएर आएका थिए । महिला भने साडी लगाएर सहभागी भएकी थिइन् ।
सुख, शान्तिको कामना गर्दै सनातनीप्रति आकर्षण बढाउन राजविराजमा दोस्रो पटक जगन्नाथ रथयात्रा निकालिएको छ । गत बर्ष पुसको पहिलो साता रथयात्रा निकालिएको थियो ।
यसअघि भारतको जगन्नाथपुरी, मथुरामा मात्रै रथयात्रा निकाल्ने गरिएपनि अहिले संसारको धेरै ठाउँमा निकाल्न थालिएको रथ यात्रा समितिका संयोजक हितेश यादवले बताए ।
