राजविराज । राजविराज नगरपालिकाभित्रको चर्चित खोला हो भलुवाही । दिनप्रतिदिन फोहोर बन्दै गएको यो खोलातर्फ सम्बन्धित निकायले कुनै चासो नदिएपछि विगतमा सरसफाई अभियान शुरु गरेको सप्तरी युथ नेपाल जागेको छ ।
युथ नेपालका पदाधिकारी एवं सदस्य भलुवाही खोलाको सरसफाईमा जुटेका छन् । हप्ताको एक दिन शनिबार भलुवाही खोलाको सरसफाई गर्न युथ नेपालका पदाधिकारी जुटेका हुन् ।
शनिबार तेस्रो हप्ताको सरसफाई भलुवाही खोलामा गरिएको छ । ‘खोला दिनप्रतिदिन फोहोर हुँदै जाँदा राजविराज नगरपालिका र स्थानीय समेतले ध्यान दिएको देखिएन’ युथ नेपालका कावा अध्यक्ष मोहन यादवले भने, ‘यसले खोलाको अस्तित्व समाप्त भइरहेको छ भने वातावरणीय प्रभाव समेत परिरहेकाले हामीले सरसफाई अभियान शुरु गरेका हौं ।’
हुन त सप्तरी युथ नेपालले केहि बर्षअघि राजविराजमा १२७ हप्तासम्म सरसफाई अभियान संचालन गरेको थियो । ‘स्थानीयलाई सरसफाईप्रति जागरुक गराउन आफूहरुले पनि सरसफाई अभियान शुरु गरेका छौं’ अध्यक्ष यादवले भने ।
राजविराज नगरपालिकाले सरसफाईका नाममा बजेट विनियोजन गर्दै आएपनि नगर अहिलेसम्म फोहोरमुक्त हुन सकेको छैन् । यसतर्फ स्थानीयले समेत चासो लिनुपर्नेमा आफ्नै घर अगाडि फोहोर फाल्दै आएका छन् ।
