राजविराज । सप्तरीमा एक युवती मृत अवस्थामा भेटिएकी छन् ।
जिल्लाको सुरुङ्गा नगरपालिका वडा नम्बर ७ हरीपुरकी १८ बर्षीया पूजा कुमारी राम मृत अवस्थामा भेटिएको प्रहरीले जनाएको छ ।
उनी आफ्नो घरदेखि ५०० मिटर दक्षिण तीनगछिया भन्ने ठाउँस्थित पोखरी छेउमा मृत भेटिएको पारिवारिक श्रोतले जनाएको छ ।
उनको हत्या गरेको जस्तो देखिएको सप्तरी प्रहरीका प्रबक्ता एवं डीएसपी जितेन्द्र कुमार बस्नेतले जानकारी दिए ।
मृतकको शवलाई पोष्टमार्टमका लागि वि.पि. कोइराला स्वास्थ्य विज्ञान प्रतिष्ठान धरान पठाइएको उनले बताए । ‘पोष्टमार्टमको रिपोर्ट आएपछि केहि भन्न सकिन्छ’ डीएसपी बस्नेतले बताए ।
युवती सोमबार राति आफ्नो भाईसँग घरमा थिइन् । उनकी आमा रामबतीदेवी राम अष्टयाममा सहभागी हुन गएकी थिइन् । पूजा आफ्ना १२ बर्षीय भाई विश्वजीतसँग थिइन् ।
विश्वजीत सुतेपछि पूजा एक्कासी हराएकी थिइन् । उनको खोजी गर्ने क्रममा मंगलबार बिहान शव भेटिएको हो ।
उनको पारिवारिक श्रोतका अनुसार पूजाको एउटा चप्पल घर अगाडि र अर्काे चप्पल केहि दूरीमा भेटिएको छ ।
