दिपेन्द्र पासवान
सुरुङ्गा । सप्तरीको सुरुङ्गा नगरपालिकामा मृत भेटिएकी युवती पूजा रामसँग यसअघि जर्वजस्ती करणीको प्रयास भएको खुलेको छ ।
१४ मंसिर २०७८ मा विद्यालयबाट घर फर्किने क्रममा उनीसँग गाउँकै तत्कालिन नाबालक रहेका जागेश्वर ठाकुरले बलात्कारको प्रयास गरेका थिए । त्यस बेला मृतक पूजा पनि नावालिका नै थिइन् ।
त्यस बेला जर्वजस्ती करणी उद्योगमा जाहेरी दिएकी उनको मुद्दा सप्तरी जिल्ला अदालतमा चलेको थियो ।
जर्वजस्ती करणीको जाहेरी परेपछि ठाकुरलाई प्रहरीले नियन्त्रणमा लिई १७ दिन हिरासतमा राखेका थिए ।
अदालतले थुन्छेक बहसका क्रममा ठाकुरलाई अदालतबाट तोकिएका तारेखमा अनिवार्य अदालतमा उपस्थित गराउने शर्तमा उनकी आमाको जिम्मा लगाउन आदेश दिएको थियो ।
अदालतले मुद्दाको फैसला गर्दा उनलाई कैद र जरिवाना तोकिएको थियो । तत्कालिन न्यायाधीश हेमन्त रावलको इजलासले जर्वजस्ती करणीको प्रयास गर्ने नावालकलाई ७ महिना १३ दिन कैद र रु ७ हजार जरिवाना तोकेको थियो ।
अदालतले कैद र जरिवाना तोक्दा उनी फरार भइसकेका छन् । सप्तरी प्रहरीका प्रबक्ता एवं डीएसपी जितेन्द्र कुमार बस्नेतले अदालतले आमाको जिम्मा लगाएकै बेलादेखि उनी फरार देखिएको बताए ।
पूजा मृत भेटिएपछि उनकी आमा राबबतीदेवीले प्रहरीमा जाहेरी दिएकी छन् । जाहेरीमा यो बलात्कार प्रयासको पनि जिकिर गरिएको छ ।
डीएसपी बस्नेतले पूजा मृत्यु प्रकरणमा यो कोणबाट पनि अनुसन्धान शुरु गरिएको बताए ।
