राजविराज । सप्तरीमा भएको माेटरसाइकल दुर्घटनामा चार दिन अघि मात्रै विवाह गरेका एक युवकको ज्यान गएको छ ।
जिल्लाको शम्भुनाथ नगरपालिका २ गोबिन्द चौकस्थित पूर्व-पश्चिम राजमार्गमा ट्याक्टरले दिएको ठक्करले मोटरसाइकलमा सबार रुपनी गाउँपालिका १ निवासी मो. आजादको ज्यान गएको हो ।
पूर्वबाट पश्चिमतर्फ जाँदै गरेको स. १ त ४९७२ नम्बरको ट्याक्टरले विपरीत दिशाबाट आउँदै गरेको आजाद सबार प्र २-००१-प ३१३५ नम्बरको मोटरसाइकललाई ठक्कर दिएको प्रहरीले जनाएको छ । ठक्करले गम्भीर घाइते भएका उनलाई रायपुरस्थित युनिक अस्पतालमा प्राथमिक उपचार गरि थप उपचारका लागि गजेन्द्रनारायण सिंह अस्पताल राजविराज ल्याइएको थियो । उनको उपचारकै क्रममा ज्यान गएको हो ।
मृतकको शव गजेन्द्रनारायण सिंह अस्पतालमै राखिएको जिल्ला प्रहरी कार्यालय सप्तरीले जनाएको छ ।
स्थानीयका अनुसार २० बर्षका आजादको चार दिन अघि मात्रै विवाह भएको थियो ।
आइतबार सप्तरीकै सुरुङा नगरपालिकाको करडबोनाकी सलमा खातुनसंग उनको विवाह भएको थियो । विवाहमै दिएको मोटरसाइकल चढेर उनी दुर्घटनामा परेका हुन ।
मोटरसाइकलको पछाडी सवार सोही ठाउँका बर्ष १७ का मो.समिर गम्भीर घाइते भएका छन् । रायपुर स्थित युनिक अस्पतालमा प्राथमिक उपचारपछि उनलाई थप उपचारको लागि धरान लगिएको प्रहरीले जनाएको छ ।
