राजविराज । सप्तरी जिल्लामा चार जना प्रतिनिधी सभा सदस्य पदका लागि १०५ जनाले उम्मेदबारी दिएका छन् । राजनीतिक दलसहित स्वतन्त्रले पनि उम्मेदबारी दिएका छन् ।
कतिपय भने दल परिवर्तन गरेर यस पटक उम्मेदबार बनेका छन् । यसअघिको निर्वाचनमा अन्य दलबाट चुनाव लडेकामध्ये आधा दर्जन व्यक्तिले यस पटक दल परिवर्तन गरी उम्मेदबारी दिएका छन् ।
यस पटक दल परिवर्तन गरी उम्मेदबारी दर्ता गराउनेमा उमेश कुमार यादव, रञ्जु झा (ठाकुर), सतिश सिंह, सिताराम साह, अनिस अन्सारी र अमरकान्त चौधरीले पार्टी परिवर्तन गरी उम्मेदबारी दिएका छन् ।
उमेश यादव यस पटक सप्तरी क्षेत्र नम्बर २ मा उम्मेदबारी दिएका छन् । उनी जनता समाजवादी पार्टी (जसपा) नेपालबाट उम्मेदबारी दिएका छन् ।
२०७९ सालको निर्वाचनमा उनी तत्कालिन नेकपा माओवादी केन्द्रबाट प्रदेश सभा सदस्यको उम्मेदबार बनेका थिए । उनी प्रदेश क्षेत्र नम्बर २ को ख मा उम्मेदबार बनेका थिए । तर, जनमतका महेश प्रसाद यादवसँग पराजित भएका थिए ।
रञ्जु झा (ठाकुर) भने यसअघिको निर्वाचनमा जनता समाजवादी पार्टी (जसपा) नेपालमा थिइन् । सो पार्टीबाट उनी समानुपातिक उम्मेदबार रहेकी उनले पद पनि पाएकी थिइन् ।
यस पटक उनी नेपाल जनता पार्टीबाट प्रत्यक्ष उम्मेदबार बनेकी छन् । यो पार्टीबाट उनले क्षेत्र नम्बर २ मा उम्मेदबारी दिएकी छन् ।
मधेश प्रदेशका पूर्व मुख्यमन्त्री सतिश सिंह पनि यस पटक पार्टी परिवर्तन गरेका छन् । २०७९ को चुनावमा जनमत पार्टीबाट उम्मेदबार भई जितेका उनी यस पटक स्वाभिमान पार्टीको उम्मेदबार बनेका छन् ।
सप्तरीको प्रदेश सभा क्षेत्र नम्बर २ को क बाट जितेर मुख्यमन्त्रीसम्म बनेका उनी जनमत पार्टीमा भएको खटपटपछि पार्टी परित्याग गर्दै आफ्नै पार्टी खोलेर चुनावी मैदानमा आएका छन् ।
गत सोमबार प्रदेश सभा सदस्यबाट राजीनामा दिएका उनी प्रतिनिधी सभा सदस्य पदका लागि सप्तरी क्षेत्र नम्बर २ बाट उम्मेदबारी दिएका छन् ।
नेपाली कांग्रेस परित्याग गरी सिताराम साह यस पटक राष्ट्रिय स्वतन्त्र पार्टीको उम्मेदबार बनेका छन् । नेपाली कांग्रेस सप्तरी क्षेत्र नम्बर ४ का सभापति रहेका उनी यसअघि खडक नगरपालिकाको मेयर र प्रदेश सभा सदस्य पदको उम्मेदबार कांग्रेसबाटै बनेका थिए ।
दुबै पदमा पराजित भएका उनी यस पटक कांग्रेस परित्याग गर्दै सप्तरी क्षेत्र नम्बर ४ मा प्रतिनिधी सभा सदस्य पदका लागि राष्ट्रिय स्वतन्त्र पार्टीबाट उम्मेदबारी दिएका हुन् ।
निर्वाचन पिच्छे दल परिवर्तन गरिरहने सप्तरीका अर्का व्यक्ति हुन अनिस अन्सारी । २०७९ को चुनावमा जनमत पार्टीबाट प्रतिनिधी सभाको उम्मेदबार बनेका उनी यस पटक राष्ट्रिय मुक्ति पार्टीबाट उम्मेदबार बनेका छन् ।
२०७९ को चुनावमा सप्तरी क्षेत्र नम्बर ३ बाट उम्मेदबार रहेका उनी यस पटक क्षेत्र नम्बर २ बाट उम्मेदबार बनेका छन् ।
जनमतअघि उनी तराई मधेश लोकतान्त्रिक पार्टीबाट उम्मेदबार बनेका थिए ।
यस पटकको चुनावमा पार्टी परिवर्तन गर्ने अर्को व्यक्ति हुन अमरकान्त चौधरी ।
२०७९ को स्थानीय तहको निर्वाचनमा लोकतान्त्रिक समाजवादी पार्टीबाट मेयर पदका उम्मेदबार बनेका थिए उनी । जिल्लाको डाक्नेश्वरी नगरपालिकाका मेयरको उम्मेदबार बनेर पराजित भएका चौधरी यस पटक प्रतिनिधी सभा सदस्य पदको उम्मेदबार बनेका छन् दल परिवर्तन गरेर ।
उनी यस पटक राष्ट्रिय स्वतन्त्र पार्टीबाट सप्तरी क्षेत्र नम्बर ३ मा उम्मेदबारी दिएका छन् ।
पिता चन्द्रकान्त चौधरीको कृयामा बसेकै अवस्थामा उनले उम्मेदबारी दर्ता गराएका हुन् ।
