राजविराज । जनमत पार्टीका अध्यक्ष डा. सिके राउतले देश नै नरहने हो कि भने अवस्था पनि सृजना हुन सक्ने देखिएको बताएका छन् ।
शनिबार राजविराजमा पत्रकार सम्मेलन गर्दै अध्यक्ष राउतले यस्तो बताएका हुन् ।
उनले देश अहिले संकटको अवस्थाबाट गुज्रिरहेको बताए । ‘संकट पनि बहुआयामिक छ, एउटा मात्रै होइन धेरै आयाममा संकट छ । यहाँको राजनीतिक अवस्था संविधानमाथि नै धावा बोलिएको छ’ उनले भने, ‘देश नै नरहने हो कि भने अवस्था पनि पनि सृजना हुन सक्ने देखिएको छ, जुन चिन्ताको बिषय हो ।’
अध्यक्ष राउतले कतै न कतै निर्वाचनको माध्यमबाट त्यहीं कुरालाई संस्थागत गर्ने हो कि ? भन्ने आशंका पनि व्यक्त गरे ।
यस्तो विदेशहरुमा भइरहेको भन्दै उनले भने, ‘पहिला एउटा विध्वसांत्मक आन्दोलन मचाइदिने त्यसपछि एउटा डमी सरकार गठन गरिदिने र त्यसैलाई संस्थागत गर्नका लागि निर्वाचनको मञ्चन मात्रै गर्ने हो कि भन्ने आशंका छ ।’
त्यहीं भएर हामी सबैलाई सचेत हुनु जरुरी रहेको उनले बताए ।
देशमा योभन्दा अगाडि पनि धेरै समस्या रहेको उनले बताए । ‘यसअघि पनि जनता सन्तुष्ट थिएनन्, राजनीतिक, आर्थिक र सामाजिक रुपमा समस्या थियो । जनता उकुसमुकुस थिए, सेवा प्रवाहमा कठिनाई थियो । भ्रष्टाचार व्याप्त थियो’ उनले भने, ‘यो कुराहरु हामी सजिलै स्वीकार गरेका थियौं ।’
जनमत पार्टीको उदय पनि त्यहीं पृष्ठभूमीमा भएको बताउँदै उनले त्यहीं कुरालाई अनुभूति र विश्लेषण गर्दै आफूले नौलो गणतन्त्रको राजनीतिक दस्तावेज नै ल्याएको बताए ।
‘देशमा संकट आउँदैछ, जनता सन्तुष्ट छैनन्, व्यवस्थामा केही न केही सुधार गर्नुपर्छ । पश्चगामी सुधार होइन अगाडि जाने सुधार हुनुपर्दछ भनेरै यो दस्तावेज ल्याएको उनले बताए ।
सप्तरी क्षेत्र नम्बर २ बाट प्रतिनिधी सभा सदस्य पदका उम्मेदबार समेत रहेका उनले कमजोर पार्टीलाई मात्रै आचारसंहिता लाग्ने गरेको बताए ।
उनले आफूलाई जनताले जिताउने विश्वास समेत व्यक्त गरे ।
