राजविराज । सप्तरीका प्रमुख जिल्ला अधिकारी (सीडीओ) टुवराज पोखरेलले भोजभतेरको नाममा भन्सार छलेर सामान ल्याउनका निम्ति कसैलाई फोन नगर्न आग्रह गरेका छन् ।
७४ औं अन्तराृष्ट्रिय भन्सार दिवसको अवसरमा राजविराज भन्सार कार्यालयले सोमबार आयोजना गरेको कार्यक्रमलाई सम्बोधन गर्दै उनले यस्तो बताएका हुन् ।
‘भोजभतेरका लागि सामान ल्याउनुपर्छ, त्यसका निम्ति फोन आइरहेको छ’ उनले भने, ‘मैले त्यस्तो काम गरेको छैन् ।’
उनले यस्तो फोन नगरिदिन सबैसँग आग्रह गर्दै फोन गरेपनि आफूले यो विषयमा चासो नलिने उनले बताए ।
उनले भन्सारको ऐन, कानुन र नियम अनुसार काम गर्न र कसैलाई कुनै किसिमको दुःख नदिन कर्मचारीलाई निर्देशन दिए ।
भन्सार कार्यालयमा आउने सामानहरु समयमै लिलामी प्रकृया अगाडि बढाउनु जरुरी रहेको भन्दै उनले अन्यथा सामानहरु सडेर राजस्व संकलनमा गिराबट आउने बताए ।
पोखरेलले संयुक्त अनुगमन गरिए चोरी, निकासी र पैठारी नियन्त्रण भई राजस्व बढ्ने बताए ।
भन्सार कार्यालय राजविराजका प्रमुख दिपेन्द्र चौरसियाको अध्यक्षतामा भएको कार्यक्रममा कोष तथा लेखा नियन्त्रण कार्यालयका प्रमुख मनोज सुनुवार, नेपाल पत्रकार महासंघ, सप्तरीका अध्यक्ष श्रवणकुमार देव, सप्तरी उद्योग बाणिज्य संघका महासचिव अमृत सञ्चेतीसहितकाले मन्तव्य व्यक्त गरेका थिए ।
