राजविराज । मधेशी राजनीति पृष्ठभूमीबाट उदाएका व्यक्ति हुन् डा. शरदसिंह यादव । तत्कालिन लोकतान्त्रिक समाजवादी पार्टी (लोसपा) बाट राजनीति यात्रा शुरु गरेका उनी पछिल्लो समय जनमत पार्टीमा सकृय भएर काम गरेका छन् । जनमतका प्रवक्ता रहेका उनी पार्टी अध्यक्ष डा. सिके राउतका दाहिने हात नै मानिएका थिए ।
यहीं यादव अहिले राउतबिरुद्ध नै उम्मेदबारी दिएका छन् । डा. राउतले सप्तरी–२ मा उम्मेदबारी दिँदा यादवले पनि आफ्नै नेतृत्वमा जन अधिकार पार्टी बनाएर यहीं क्षेत्रबाट उम्मेदबारी दिएका छन् । उनी भन्छन्, ‘यो क्षेत्रको जर्जर अवस्था देखेपछि सुधार्ने योजनाका साथ उम्मेदबारी दिएको छु ।’
मधेशको अधिकारको नाममा जनताको मत लिई यहाँबाट जितेर गएकाहरुले अधिकार प्राप्तिकै कुरा गरिरहँदा विकासीय कामहरु ओझेलमा परेको बताउँछन् उनी । ‘अधिकार प्राप्तिको लडाईमा केहि त भएको छ, तर अधिकार प्राप्तिको लडाई लामो भएको हुनाले विकासहरु ओझेलमा पर्यौं र हामी जर्जर अवस्थामा पुग्यौं’ उनी भन्छन्, ‘मेरो उम्मेदबारी यहीं कुराहरुलाई लिएर हो ।’
आफूले अधिकार प्राप्ति सँगसँगै क्षेत्रको आधारभूत आवश्यक्ताहरु पूरा गर्न र विकासको मूल फुटाउन उम्मेदबारी दिएको उनको भनाई छ ।
सप्तरी–२ आफ्नो जन्मस्थान रहेको भन्दै उनी यहीं क्षेत्रमा रहेको नेपालकै पहिलो टाउन प्लानिङ्ग सिटी राजविराज नगरपालिकाको अवस्था कहालिलाग्दो रहेको बताउँछन् । ‘जयपुरको ढाँचामा बनाइएको शहर दिनप्रतिदिन पछि पर्दै गएको छ । यहाँका विद्यालय र कलेजमा पहाडका विद्यार्थी पढ्न आउँथे, अहिले यहाँको शिक्षाको अवस्था डामाडोल छ ।’
महेन्द्र विन्देश्वरी बहुमुखी क्याम्पस देशकै शान भएको भन्दै उनले अहिले यो क्याम्पसको हवीगत भएको उनको भनाई छ ।
गजेन्द्रनारायण सिंह अस्पतालमा धेरै ठाउँबाट बिरामी उपचारका लागि आउने गरेपनि अहिले अस्पतालबाट बिरामीहरु बाहिर पठाइने गरेको छ’ उनले भने, ‘समग्रतामा शिक्षा र स्वास्थ्यको अवस्था कहालिलाग्दो छ ।’
क्षेत्रका युवाहरु कुलतमा फँस्दै गएको अर्को समस्या यहाँ बिकराल रहेको उनी बताउँछन् ।
यहीं समस्याहरुलाई केन्द्रमा राख्दै समाधानका निम्ति आफू उम्मेदबार बनेको उनको भनाई छ ।
देशमका भ्रष्टाचार बेथितिबिरुद्ध २४ भदौमा जेनजी आन्दोलनले ल्याएको परिवर्तनले विश्व नै अचम्भित भएको भन्दै उनले मधेशमा पनि एउटा परिवर्तन लहर ल्याउन आफूले पार्टी नै गठन गरेको उनी बताउँछन् । ‘अहिले परिवर्तन पुराना मधेशवादी पार्टीहरुबाट सम्भव नहुने देखेर आफूले नयाँ बार्टी नै बनाएको उल्लेख गर्दै उनी भन्छन्, ‘अब हामी मिलेर जनताको अधिकारका लागि र विकासका अघि बढ्नुपर्छ ।’
यो निर्वाचनले पार्टीलाई जनताको म्यान्डेड मार्फत संस्थागत गर्ने प्रयासमा रहेको भन्दै उनले सप्तरीसहित हरेक जनताले पार्टीलाई माया गर्नेमा आफू विश्वस्त रहेको उनको भनाई छ ।
