मधेश सम्वाददाता
राजविराज, २० भदौ ।
नेपाल विद्युत प्राधिकरणले सप्तरीको हनुमाननगर कंकालिनी नगरपालिका वडा नम्बर १ भारदहमा आफ्नो काउन्टर संचालनमा ल्याएको छ ।
विद्युत महसुल बुझाउने काउन्टर सोमबारदेखि संचालनमा आएको हो । नगरपालिकाको वडा नम्बर १ भारदह, वडा नम्बर ३ पोर्ताहा, वडा न्म्बर ४ मधवापुरसहित महादेवा र तिरहुत गाउँपालिकाका बासिन्दालाई अब विद्युत महसुल बुझाउन सजिलो भएको छ । यसअघि यस ठाउँका बासिन्दालाई महसुल बुझाउन कंचनरुप नगरपालिका पुग्नुपर्ने बाध्यता थियो ।
काउन्टरको एक कार्यक्रमकाबीच नेपाल विद्युत प्राधिकरण मधेश प्रदेशका निर्देशक मुनेन्द्र ठाकुरले उद्घाटन गरेका छन् ।
त्यस अवसरमा बोल्दै उनले १२ हजार ग्राहकलाई लक्षित गर्दै यो काउन्टर संचालनमा ल्याइएको बताए । अहिले काउन्टरको रुपमा संचालनमा आएपनि भविष्यमा शाखाको रुपमा विकास गरिने उनले बताए ।
मधेश प्रदेशमा २५ प्रतिशत विद्युत चुहाबट भइरहेको भन्दै उनले यो नियन्त्रण नभए केन्द्रले अर्कै नजरले हेर्ने बताए । प्रदेशभरि ९९ प्रतिशत विद्युतिकरण भइसकेको र कृषि क्षेत्रमा विद्युतिकरणका लागि प्रयासरत रहेको उनले बताए ।
नेपाल विद्युत प्राधिकरण शाखा कंचनपुरका प्रमुख संजीबकुमार साहको अध्यक्षतामा भएको कार्यक्रममा वडा न्म्बर १ भारदहका अध्यक्ष सुरेन्द्र मण्डल, वडा नम्बर ३ पोर्ताहाका अध्यक्ष विजय यादवसहितकाले बोलेका थिए ।
