मधेश सम्वाददाता
राजविराज, २० भदौ ।
जनता समाजवादी पार्टी (जसपा) अध्यक्ष उपेन्द्र यादवलाई प्रतिनिधी सभा उम्मेदबारको रुपमा सप्तरीका चार वटै क्षेत्रबाट नाम सिफारिस गरिएको छ । सबै क्षेत्तबाट उनको नाम प्रतिनिधी सभा उम्मेदबारका लागि सिफारिस गरिएको हो ।
जिल्लाबाट प्रतिनिधि सभा सदस्यका लागि कुल १३ जनाको नाम सिफारिसमा परेकामध्ये चारवटै क्षेत्रबाट अध्यक्ष यादवको नाम सिफारिस गरिएको छ ।
निर्वाचन क्षेत्र नम्वर २ बाट अध्यक्ष यादवको नाम सर्वसम्मतले सिफारिस भएर आएको छ ।
निर्वाचन क्षेत्र नम्वर १ मा अध्यक्ष यादवसँगै नवलकिशोर साह ‘रामबाबु’ र डा.सुर्यनारायण यादवको नाम सिफारिस भएको छ । साह पार्टीका केन्द्रीय कार्यकारिणी सदस्य एवम् मधेश प्रदेशका सामाजिक विकास मन्त्री हुन् भने सिफारिसमा परेका डा.यादव प्रतिनिधि सभा सदस्य हुन् । उनी यसअघि सोही क्षेत्रबाट निर्वाचित भएका थिए ।
यस्तै, क्षेत्र नम्वर ३ बाट अध्यक्ष यादवसँगै पार्टीका राजनीतिक समिति सदस्यहरु शैलेन्द्र प्रसाद साह, कैलास प्रसाद यादव र विशेश्वर रजक तथा केन्द्रीय समिति सदस्य शियाराम साह प्रतिनिधि सभा सदस्यका लागि सिफारिस भएका छन् ।
मधेश प्रदेशका अर्थमन्त्री समेत रहेका शैलेन्द्र यसअघि क्षेत्र नम्वर २ (क)बाट निर्वाचित भएका थिए ।
क्षेत्र नम्वर ४ बाट पनि अध्यक्ष यादवको नाम सिफारिसमा परेका छन् । यादवसँगै मनोज यादव, मनोजकुमार यादव र हेमायु हक प्रतिनिधि सभा सदस्यका लागि सिफारिस भएका हुन् । २०७४ को स्थानीय तह निर्वाचनमा खडक नगरपालिकाको मेयरमा निर्वाचित भएका हक पछिल्लो स्थानीय तहको निर्वाचनमा पराजित भएका थिए ।
