आसन्न चुनाव नजिकिँदै गर्दा दैनिक जसो जनकपुरधामक मेयर लालकिशोर साह सहभागी भएका कार्यक्रमको तस्बीर आफ्ने समाजिक सञ्जाल फेसबुकको भित्तामा पोस्टिन्छन् । फेरि मेयर लड्ने तयारीमा रहेका साह आफूले गरेका सामाजिक तथा पार्टीगत गतिविधि धेरै जनता सामु पुर्याउन फेसबुकलाई पैसा तिरेर हरेक पोस्टलाई ‘स्पोनसर्ड’ गर्छन् ।
२०७४ सालको चुनावमा तत्कालिन राष्ट्रिय जनता पार्टी नेपाल (राजपा)बाट मेयरमा निर्वाचित भए यता सरकारी सेवासुविधामा मेयर साह र उनको घरपरिवारको जीवन शैली अप्रत्यासित रुपमा फेरिएको छ । घरको डेकोरेशन, लुवाई खुवाई, चालढाल, रहसनसहन राजारजौटेको ठाँटको झझको दिन्छ । तर जनताले तिरेको एक–एक पैसा करबाट चलेको सरकारी ढुकुटीबाट सेवासुविधा र अनियमिततामा रमाउने मेयर साह १० वर्ष भन्दा बढी समयदेखि आफ्नो घरमा उपभोग गरेको खानेपानपीको महसुल भने तिरेका छैनन् ।
पदमा पुगेपछि सरकारी ढुकुटीबाट डेढ करोडको चिल्लो गाडी किनेर चढ्ने तथा आफ्नो कार्यकक्षको शौचालयमा एसी लगाउने मेयर साहले बास्तवमै १० वर्षभन्दा बढीसमयदेखि खानेपानीको महसुल नतिरेको तथ्य फेला परेको हो ।
टुडेपाटीका सम्पादक समेत रहेका पत्रकार शैलेन्द्र महतो क्रान्तिले जनकपुरधाम स्थित नेपाल खानेपानी संस्थान कार्यालयबाट सूचनाको हक प्रयोग गरी मागेको विवरणमा मेयर साहले १० वर्ष बढी समयदेखि विद्युत महसुल नतिरेको उल्लेख छ ।
जनकपुरधाम उपमहानगरपालिका वडा नं. ८ मा रहेको उनको घरमा जडान गरिएको खानेपानीको धाराको महसुल गत चैत मसान्तसम्म १ लाख ४६ हजार रुपैयाँ महसुल बाँकी रहेको छ । धारा मेयर लालकिशोर प्रसाद साहकै नाममा जडान छ ।
खानेपानी संस्थान कार्यालयले पटक पटक महसुल तिर्न ताकेता गर्दागर्दै थाकिसकेको छ । तर मेयर साहले पदको आडमा टेरेका छैनन् । डरले संस्थानका कर्मचारी पनि उनको धाराको लाइन काट्ने हिम्मत गर्न सकेका छैनन् ।
उल्टै धाराको महसुल छुट गर्न कर्मचारीलाई धमास दिने गरेको पनि कार्यालयले जनाएको छ । मेयरका घरपरिवारका सदस्य पटक–पटक संस्थानका कर्मचारीलाई दबाब दिँदै आएको एक कर्मचारीले बताए ।
‘खानेपानीको महसुल बुझाउन वर्षमा पटक पटक ताकेता गर्दा मेयर साहले कुनै वास्ता गर्नुभएको छैन । उल्टै उहाँको परिवारका सदस्य आएर महसुल तिर्दैनौं । जसरी पनि छुट गर्नु पर्छ भन्दै दबाब दिँदै आएका छन् ’ ती कर्मचारीले नाम उल्लेख नगर्ने सत्र्तमा भने ।
त्यति मात्र होइन मेयर साहकै आफन्त पर्ने वडा नं. ८ मै घर भएका दिलीप साहकी श्रीमती विना साहको नाममा रहेको धाराको महसुल पनि वर्षौदेखि नतिरेको पाइएको छ । बिनादेवी साहको नाममा ९५ हजार ७३४ रुपैयाँ खानेपानीको महसुल बाँकी रहेको छ । मेरको आफन्त भनेर उनीहरुले तिर्न नमानेर महसुल छुट गर्न दबाब दिने गरेको कार्यालयका ती कर्मचारीले बताए ।
हुन त वीरगञ्ज स्थित खनेपानी संस्थानले खानेपानीको महसुल नतिरेपछि मधेश प्रदेशका मुख्यमन्त्री लालबाबु राउतको घरको धाराको लााइन काटेका थियो । तर जनकपुर संस्थानका कर्मचारीले त्यस्तो आँट देखाएका छैनन् ।
फेरि जसपाबाट मेयर लड्ने तयारीमा रहेका साहलाई उम्मेदवारी दर्ता गराउनु अघि सो महसुल तिर्नैपर्ने बाध्यता छ । ११ गते भित्र उनले मेयर पदबाट राजिनामाको साथै बाँकी बँक्यौत सरकारी महसुल, बेरुजु तिर्नुपर्ने निर्वाचन आयोगले जारी गरेको उम्मेदवारको मापदण्डमा उल्लेख छ ।
यसले मेयर साह जस्तै अन्य पनि जनकपुरका प्रतिष्ठित व्यक्तिहरु वर्षौदेखिको बाँकी खानेपानीको महसुल तिर्न मानेका छैनन् । जकपुरकै अर्का प्रतिष्ठित व्यक्ति ं तमलोपाका नेता डा. विजय सिंहमाथि पनि दुईवटा खानेपानी धाराको झण्डै २ लाख रुपैयाँ महसुल बाँकी रहेको छ । डा. सिंहको जनकपुरधाम उपहानगरपालिका वडा नं. १० मा छुट्टा छुट्टै दुई ठाउँमा रहेको घरमा धारा जडान छ । उनकै परिवारका सदस्य निर्मला सिंहको नाममा रहेको खनेपानी धाराको १ लाख ४ हजार ११९ रुपैयाँ र राजकुमारी सिंहको नाममा रहेको खानेपनी धाराको ७७ हजार ८८४ रुपैयाँ महसुल बाँकी रहेको विवरणमा उल्लेख छ । डा. सिंह संविधानसभा सदस्य हुन् ।
त्यस्तै रघुपति मिष्ठान भण्डारले खरिद गरेको दुईवटा घरको धाराको १ लाख ६० हजार भन्दा बढी रकम बाँकी रहेको छ । खैरुन खातुनको नाममा रहेको धाराको ८४ हजार ८८० रुपैयाँ र लक्ष्मी देवीको नाममा रहेको धाराको ८४ हजार ९४६ रुपैयाँ महसुल बाँकी रहेको विवरणमा उल्लेख छ ।
जनकपुरधाममा झण्डै साढे ४ हजार घर तथा संघसंस्थामा खानेपानीको धारा जडान छ । कार्यालयका अनुसार अहिले पनि ३ करोड रुपैयाँ भन्दा बढी खानेपानीको महसुल असुल उपर गर्न बाँकी छ ।
