सेवाबाट हटाइएपछि भारदह अस्पतालका कर्मचारीको प्रदर्शन

मधेश सम्वाददाता
भारदह, ९ माघ ।
सेवाबाट हटाइएपछि हनुमाननगर कंकालिनी नगरपालिकाको भारदहस्थित अस्पतालका करार कर्मचारीले सोमबार प्रदर्शन गरेका छन् ।
अस्पतालले ६ जना पाले, २ जना फर्मास्टिक र १ जना मालीलाई हालै हटाएको छ । एकै विज्ञापनबाट २४ जना कर्मचारीलाई करारमा नियुक्त गरेपनि ९ जनालाई मात्रै हटाएको उनीहरुले बताएका छन् । कुनै कारण नदेखाई हटाउँदा आफूहरु समस्यामा परेको भन्दै उनीहरुले पुर्नबहालीको माग गरेका छन् ।
उनीहरुले ‘कर्मचारीहरुको म्याद थप गर, रोजगार सुरक्षा गर, पुरानो अनुभवी कर्मचारीलाई हटाउन पाइँदैन’ जस्ता नारा लगाएका थिए ।
निकालिएका ९ जना कर्मचारीले सोमबार हनुमाननगर कंकालिनी नगरपालिकाको प्राङणमा प्रदर्शन गर्दै नाराबाजी गरेका छन् । आफूहरुको म्याद थप नगरिए अझ संघर्षमा उत्रने उनीहरुले बताएका छन् ।