मधेश सम्वाददाता
राजविराज, ११ माघ ।
नेपाली कांग्रेस सप्तरीले संघीय संसद भवन, नयाँ बानेश्वर अगाडि इलामका ३६ बर्षीय प्रेम प्रसाद आचार्यले शरीरमा आगो लगाएर आत्मदाह र सप्तरीको छिन्नमस्ता गाउँपालिका २ का रामदेव मरिकले झुण्डिएर गरेको आत्महत्या घट्नाप्रति गम्भीर ध्यानाकर्षण भएको जनाएको छ ।
कांग्रेस, सप्तरीका प्रबक्ता नन्दकिशोर यादवले बुधबार प्रेस बिज्ञप्ती जारी गर्दै आचार्यले राज्यको आर्थिक नीतिका कारण व्यवसायमा असफलता प्राप्त गरेपछि र मरिकले लिएको ऋणको किस्ता समयमा तिर्न नसक्दा आत्महत्या गरेको बताएका छन् ।
‘यो दुबै घट्ना बर्तमान सरकारको चरम लापर्वाही, गलत आर्थिक नीतिका कारण भएको छ’ बिज्ञप्तीमा भनिएको छ, ‘यो घट्नाले समग्र देशलाई नै लज्जित बनाएको छ । यस किसिमका घट्ना हुँदा पनि सरकार नजुर्मराउनु बिडम्बना हो ।’
स्वदेशमै रोजगारीको अवस्था सृजना गर्न नसक्नु, जनताभन्दा पनि व्यक्तिगत स्वार्थमा लिप्त रहेकै कारण देश र जनताको अवस्था कहालिलाग्दो अवस्थामा पुगेको बिज्ञप्तीमा भनिएको छ ।
देशको अर्थतन्त्रमा सुधार नल्याएसम्म, व्यापारीको पक्षमा अर्थ नीति नबनेसम्म यस किसिमको घट्ना भइरहने भन्दै विज्ञप्तीमा देशको अर्थ व्यवस्थामा सुधार ल्याउन, व्यापार गर्नेलाई बैंकिङ प्रणाली सुलभ बनाउन माग गरिएको छ ।
