मधेश सम्वाददाता
राजविराज, ११ माघ ।
निर्वाचन खर्च नबुझाउने उम्मेदबारलाई निर्वाचन आयोगले जरिवाना तोकेपछि सप्तरीका जनप्रतिनिधी र तत्कालिन उम्मेदबारहरु नतिर्नेमा एकमत देखिएका छन् । उनीहरुले जरिवाना मिनाहा नगरिए आन्दोलन गर्ने चेतावनी दिएका छन् ।
जिल्लाका जनप्रतिनिधी एवं तत्कालिन उम्मेदबारहरुले बुधबार प्रमुख जिल्ला अधिकारी भूपेन्द्र थापा मार्फत् निर्वाचन आयोगका प्रमुख आयुक्तलाई ज्ञापन पठाएका छन् ।
स्थानीय शिब मन्दिर प्राङणमा भेला भएर ज्ञापन बुझाउन गएका उनीहरुले आयोगले तोकेको जरिवाना वापतको रकम तत्काल मिनाहा हुनुपर्ने माग राखेका छन् ।
जिल्ला समन्वय समितिका प्रमुख शिवनारायण साहको नेतृत्वमा जिल्लाका पालिका प्रमुखहरु, तत्कालिन उम्मेदबारहरु, राजनीतिक दलका नेताहरु ज्ञापन बुझाउन गएका थिए ।
आयोगले खर्चको विवरण नबुझाउने उम्मेदबारलाई तोकिएको जरिवाना वापतको रकम बुझाउने सम्बन्धमा सम्प्ूर्ण राजनीतिक दल एवं जनप्रतिनिधी तथा सम्पूर्ण स्थानीय तहका निर्वाचित पदाधिकारी सम्मिलित १० माघमा बैठक बसेको ज्ञापनमा उल्लेख गरिएको छ । जरिवाना राजनीतिक दलहरुको राजनीतिक चरित्रमाथि पर्ने धोखा र राजनीतिक गर्नबाट बंचित गराउने निर्णय भएकोले जरिवाना तत्काल मिनाहा गर्न माग गरिएको छ । माग पूरा नभए चरणबद्ध आन्दोलनमा उत्रने चेतावनी ज्ञापनमा दिइएको छ ।
