मधेश सम्वाददाता
राजविराज, १४ माघ ।
प्रत्येक सरस्वती पूजाको अवसर पारेर सप्तरीको तिलाठी–कोइलाडी गाउँपालिकामा आयोजना गरिने कुस्ती प्रतियोगिता शनिबारदेखि शुरु भएको छ ।
स्व. साकेतचन्द्र मिश्रको स्मृती एवं सम्मानमा १३ औं अन्तराष्ट्रिय महिला तथा पुरुष कुस्ती प्रतियोगिता तिलाठी कोइलाडी गाउँपलिका १ तिलाठीस्थित गाउँपालिका कार्यालयको छेउमा शुरु भएको हो ।
शनिबार भएको दुई प्रतिस्पर्धामध्ये पुरुषतर्फको प्रतिस्पर्धामा नेपाली र महिलातर्फ भारतीय कुस्तीवाज विजयी भएका छन् ।
पुरुषतर्फ नेपालका राहुल थापाले भारतको झारखण्ड राज्यका हलचल सिंहलाई हराए । जितेका थापा भने नवलपरासीका हुन् ।
महिलातर्फ भारत हरियाणाकी कंचनले भारतकै .बिहारकी पुनमलाई हराइन् ।
यसअघि एक भव्य समारोहबीच शहीद शाकेतकी आमा चपलादेवीले प्रतियोगिताको उद्घाटन गरिन् ।
पञ्चायती ब्यवस्थाबिरुद्धको आन्दोलनमा २०४२ सालमा ज्यान गुमाएका स्व. मिश्रको स्मृती एवं सम्मानमा आयोजित प्रतियोगिताको आयोजना गरिएको हो ।
बसन्त पञ्चमीको अवसर पारेर पछिल्लो १३ वर्षदेखी तिलाठीमा नियमित सरस्वती पूजा तथा मेला समितिद्वारा अन्तराष्ट्रिय स्तरको कुस्ती प्रतियोगिताको आयोजना गरिदै आएको छ ।
सरस्वती पूजा, मेला तथा प्रतियोगिता मूल आयोजक समितिका अध्यक्ष अजितकुमार मिश्र पप्पुले परमपरागत रुपमा हुँदै आएको कुस्ती खेलप्रति अहिले पनि जनमानसमा निकै लोकप्रियता रहेको बताए ।
अध्यक्ष मिश्राको अध्यक्षतामा आयोजित उद्घाटन समारोहमा तिलाठी कोइलाडी गाउँपालिकाका अध्यक्ष अरुण मण्डल, वडा अध्यक्ष दिनेश्वर मिश्र, स्वं. मिश्रका भाई शैलेशचन्द्र मिश्र, राकेश मिश्र, मिन्टु मिश्र, नरेशचन्द्र मिश्र, पत्रकार महासंघका सभापति श्रवण देव लगायतको उपस्थिति रहेको थियो ।
चार दिनसम्म चल्ने प्रतियोगितामा नेपाल तथा छिमेकी राष्ट्र भारतका १८ महिला र ४२ पुरुष खेलाडी सहभागी रहेको आयोजक समितिले जनाएको छ ।
