मधेश सम्वाददाता
राजविराज, १४ माघ ।
नेकपा एकीकृत समाजवादी पार्टीका अध्यक्ष माधव कुमार नेपालले बर्तमान सरकारले राम्रो गर्न नसकेको बताएका छन् ।
राजविराजमा शनिबार समाजवादी प्रेस संगठनले आयोजना गरेको पत्रकार सम्मेलनमा अध्यक्ष नेपालले कुरा ठूला ठूला गर्ने तर काम नगर्ने सरकारको लक्षण देखिइसकेको बताए । ‘जुन जोगी आएपनि कानै चिरेको भने झैं अहिलेको सरकारको पनि अवस्था छ’ उनले भने ।
पुरै सत्ता कव्जा गर्ने नियत अनुसार नै अहिलेको नेतृत्व अघि बढिरहेको उनले बताए । सभामुख, उपसभामुख, राष्ट्रपति, उपराष्ट्रपति, संवैधानिक निकाय कब्जा गरेर पछि प्रधानमन्त्री पनि लिने नियतका साथ नेतृत्व अघि बढिरहेको बताए । उनले निःस्वार्थ भावनाका साथ देशमा काम भइनरहेको बताए ।
भ्रष्टाचारलाई निर्मूल पारेर जनतालाई सहज तरिकाले शिक्षा र स्वास्थ्य सेवा दिनुपर्नेमा त्यस्तो नभइरहेको उनले बताए ।
अहिलेको सरकारले वाचा, बन्धन धेरै गरेपनि पूरा गर्ने छाँटकाँट नदेखिएको भन्दै उनी देशको राजनीति कसरी कोल्टो फेर्ने हो त्यो अहिले भन्न नसकिने बताए । ‘हामीले पनि सरकारलाई सुझावहरु दिएका छौं, त्यो मनन गरे राम्रै हुन्छ’ नेपालले भने, ‘नभै यो सरकार पनि पुरानै ढर्रामा जान्छ ।’
विचार मिल्ने पार्टीहरुसँग पार्टी एकता वा मोर्चाबन्दी गर्न आफूहरु तयार रहेको उनले बताए । यसका निम्ति जनता समाजवादी पार्टी (जसपा), नेकपा माओवादी केन्द्र, चन्द्रदेश जोशी नेतृत्वको नेकपा संयुक्तसँग वार्ता भइरहेको उनले बताए ।
अध्यक्ष नेपालले जसपाले आफ्नो पार्टीसँग एकताको कुरा गर्दा सरकारमा सहभागिता नदिएको कुरा बाहिर आएको बताए । ‘यो संकीर्ण र असहिष्णु कुरा हो’ उनले भने ।
राष्ट्रपतिको चुनावको सन्दर्भमा कुराकानी भइरहेको बताउँदै उनले कुन दललाई राष्ट्रपति दिने भन्ने बिषयमा छलफल हुने बताए ।
