मधेश सम्वाददाता
राजविराज, १५ माघ ।
प्रेस सेन्टर नेपालको १९औं स्थापना दिवसको अवसरमा राजविराज ८ स्थित राष्ट्रिय आधारभूत विद्यालयमा अध्ययनरत बालबालिकालाई शैक्षिक सामग्री प्रदान गरिएको छ ।
मधेश प्रदेशका सांसद माला कर्णले शैक्षिक सामग्री बितरण गरिन् । उनले विद्यालयका ३५ जना बालबालिकालाई ५÷५ वटा काँपी र २÷२ वटा डटपेन प्रदान गरिन् ।
काँपी र डटपेन बितरण गर्दै उनले आगामी दिनमा प्रदेशका सामुदायिक विद्यालयहरुमा शैक्षिक गुणस्तर सुधारको निम्ति आफूले प्रदेश सरकारसँग आग्रह गर्ने बताइन् । उनले राजविराज वडा नम्बर ८ मा एउटा मात्र सामुदायिक विद्यालय रहेकाले यसलाई नमूना विद्यालयको रूपमा परिणत गर्नुपर्नेमा जोड् दिइन् ।
पछिल्लो समय यस विद्यालयमा दलित समुदायका डेढ सय विद्यार्थी अध्ययनरत रहेको र उनीहरु नियमित नआउँदा पठनपाठनमा समस्या हुँदै आएको शिक्षिका रेणु गुप्ताले बताइन् ।
बालबालिकालाई शैक्षिक सामग्री वितरण प्रेस सेन्टर नेपालको जिल्ला समन्वय समिति सप्तरीका अध्यक्ष दिनानाथ यादवको अध्यक्षतामा सम्पन्न भएको थियो । त्यस क्रममा नेपाल पत्रकार महासंघका केन्द्रीय सदस्य ललिता साह, प्रेस सेन्टर नेपालका प्रदेश महासचिव गोपाल प्रसाद गुप्ता, सचिव ध्रुव कुमार मंडल, जिल्ला उपाध्यक्ष कमानन्द माझी, कोषाध्यक्ष जितेन्द्र गुप्तासहितको उपस्थिति थियो ।
