मधेश सम्वाददाता
राजविराज, १६ माघ ।
हावाहुरी आएकै समयमा होस नपु¥याएर घुर बाल्दा आगो लाग्छ । आगोले समुदायभित्रका अधिकांस घर जल्छ । यसले धेरै क्षति गराउँछ । तत्कालै प्रहरी, नेपाली सेनासहितका सुरक्षाकर्मी र स्थानीय बासिन्दा जुटछन् । घरभित्र रहेका बालबालिकालाई निकाल्छन् । आगो निभाउने प्रयास गर्छन् । गाउँका मुखियाले दमकललाई पनि बोलाउँछन् ।
सबै मिलेर आगोलाई नियन्त्रणमा लिएपनि क्षति भइसकेको हुन्छ । आगलागीमा परी घाइते भएकालाई तत्कालै उपचार केन्द्रमा पु¥याएर उपचार गराइन्छ । त्यसपछि आगलागीमा सर्वस्व गुमाएकालाई राहत प्रदान गरिन्छ ।
हुन त माथि देखाइएको घट्ना काल्पनिक हो । हाम्रो गाउँघरमा अत्यधिक हुने आगलागीका घट्नालाई नियन्त्रण गर्नका लागि सुरक्षाकर्मी र सरोकारबालाले सोमबार राजविराजस्थित राज रंगशालामा आगलागीका घट्ना भएपछि गरिने नियन्त्रण र उद्धारका कसरी गर्ने सन्दर्भमा ‘डेमो’ प्रदर्शन गरिएको छ ।
आगलागी घट्ना नियन्त्रण गर्न र समस्यामा परेका अग्निपीडितको उपचारदेखि राहत बितरण गर्ने कार्यसम्मलाई यहाँ प्रदर्शन गरियो । यसले आगलागीका घट्ना नियन्त्रण गर्न सजिलो हुने सरोकारबाला बताउँछन् ।
जिल्ला विपद व्यवस्थापन समीतिले आयोजना गरेको ‘डेमो’ प्रदर्शनीमा नेपाली सेनाको बरख गण भलुवाही, जिल्ला प्रहरी कार्यालय सप्तरी, सशस्त्र प्रहरी बल नेपाल नम्बर ६ गण सप्तरी, जिल्ला रेडक्रस सोसाइटी समेतले सहकार्य गरेको थियो ।
जिल्ला बिपद ब्यबस्थापन समिति सप्तरीका संयोजक समेत रहेका प्रमुख जिल्ला अधिकारी भुपेन्द्र थापाको अध्यक्षतामा नेपाली सेना श्री नं.२७ बाहिनी सिराहाका सहायक रथि भरतचन्द्र गुरुङ्गको प्रमुख आतिथ्यमा भएको प्रदर्शनीमा राजविराज नगरपालिकाका कार्यबाहक प्रमुख ईसरत प्रविण, नेपाली सेना बरख गण भलुवाही सप्तरीका प्रमुख सेनानी दुर्गा बहादुर थापा, जिल्ला प्रहरी कार्यालय सप्तरीका प्रमुख एसपी अबि नारायण काफ्ले, राष्ट्रिय अनुसन्धान सप्तरीका उप अनुसन्धान निर्देशक टिका प्रसाद पोखरेल, सशस्त्र प्रहरी बल नेपाल नम्बर ६ गण का डीएसपी नवीन सिंह राई ,नेपाल रेडक्रस सोसाइटी सप्तरीका सभापति जोगेन्द्र भगत, नेपाल रेडक्रस सोसाइटीका शाखा अधिकृत निरन्जन यादवसहितको उपस्थिति रहेको थियो ।
