मधेश सम्वाददाता
राजविराज, १६ माघ ।
नेपालकी १७ बर्षीया बालिकासँग विवाह गरेर जाँदै गरेका ४१ बर्षीय पुरुषसहित तीन जना भारतीय पक्राउ परेका छन् ।
उनीहरुलाई सप्तरीको राजगढ गाउँपालिका वडा नम्बर २ बाट सशस्त्र प्रहरीको टोलीले पक्राउ गरेको जिल्ला प्रहरी कार्यालय, राजविराजले जनाएको छ ।
भारतको जम्मु कश्मिर घर भएका ४१ बर्षीय गुलाब जिलानीसहित सोही ठाउँका ४० बर्षीय रफिक खार, २७ बर्षीया नुरजहान र बालिकालाई सशस्त्र प्रहरी बल नेपाल बोर्डर आउट पोष्ट बनैनियाँबाट खटिएको टोलीले पक्राउ गरेको हो ।
सप्तरीको महादेवा गाउँपालिका वडा नम्बर १ की १७ बर्षीया बालिकासँग गुलाब जिलानीको विवाह गराई बालिकासहितलाई लिएर उनीहरु भारततर्फ जाँदै गर्दा पक्राउ परेको प्रहरीले जनाएको छ ।
बालविवाह गराई भारततर्फ लग्न खोजेको देखिएपछि उनीहरुलाई नियन्त्रणमा लिई बालविवाह मुद्दामा जिल्ला अदालतबाट म्याद थपको अनुमति लिएर अन्य अनुसन्धान गरिरहेको सप्तरी प्रहरीका प्रबक्ता एवं डीएसपी नरेश कुमार सिंहले जानकारी दिए ।
