मधेश सम्वाददाता
राजविराज, १८ माघ ।
लिएको ऋण वापतको किस्ता तिर्न नसकेर आत्महत्याको बाटो रोजेका सप्तरीको छिन्नमस्ता गाउँपालिकाका रामदेव मरिकको परिवारलाई मधेश प्रदेशका पूर्व अर्थमन्त्री शैलेन्द्र साहले सहयोग गरेका छन् ।
बुधबार छिन्नमस्ता गाउँपालिका वडा नम्बर २ स्थित मरिकको घरमा पुगी साहले सहयोग गरेका हुन् । पूर्व मन्त्री साहले मरिकको परिवारलाई रु ११ हजार सहयोग गरे ।
मरिकले लिएको ऋण छिन्नमस्ता गाउँपालिकाका जनप्रतिनिधीले आफ्नो भत्ताबाट तिरिदिने यसअघि नै बताइसकेका छन् ।
गत बैशाखमा २० वर्षीय जेठो छोरा राजकुमार मरिकको भारतबाट विवाह गरेका रामदेवले त्यसबेला गाउँमै ब्याजमा ऋण लिएका थिए । त्यसले पनि नपुग्ने देखेपछि श्रीमती उर्मिलादेवीलाई वित्तीय संस्थामा आबद्ध गराउँदै उर्मिलादेवीको नाममा १३ मंसिर २०७८ मा ग्लोबल आईएमई लघुवित्त वित्तीय संस्थाबाट ९० हजार ऋण लिएका थिए । किस्ता चुक्ता गर्दै अहिले ४४ हजार ३ सय ३२ रुपैयाँ साँवा र २ सय ७१ रुपैयाँ ब्याज तिर्न बाँकी छ ।
हरेक महिनाको ९ गते वित्तीय संस्थाको किस्ता तिर्नुपर्नेमा गत सोमबार उर्मिलादेवी समूहको बैठकमा नगएपछि संस्थाका कर्मचारी र समूहका सदस्य किस्ता लिन घरमै आएको र किस्ता तिर्ने पैसा नभएपछि रामदेवले श्रीमती उर्मिलालाई मेरो पति घरमा छैन भनेर सुनाइदिन भनेका थिए ।
मंगलबार जसरी भए पनि किस्ता बुझाउनु भनेर गएपछि रामदेव सोमबार साँझदेखि नै गाउँमा ऋण खोज्न थालेका थिए । रामदेवले कर्जा चुक्ता गर्न नसक्दा तनावमा रहेका कारण आत्महत्या गरेको परिवारजनको भनाई छ ।
