मधेश सम्वाददाता
राजविराज, २२ माघ ।
सप्तरी प्रहरीले अदालतबाट कैद र जरिवाना तोकिएपछि फरार रहेका २२ जना प्रतिवादीलाई एकै दिन पक्राउ गरेको छ ।
जिल्लाको बिभिन्न ठाउँबाट बिभिन्न मुद्दामा कैद र जरिवाना तोकिएका उनीहरुलाई पक्राउ गरिएको जिल्ला प्रहरी कार्यालय, सप्तरीले जनाएको छ ।
लेनदेन बिगा मुद्दामा २ महिना कैद तोकिएका डाक्नेश्वरी नगरपालिका ८ बस्ने भगवती प्रसाद साह, सोही मुद्दामा ६ महिना कैद तोकिएका कंचनरुप नगरपालिका ६ बस्ने सुनिता देवी साहलाई पक्राउ गरिएको छ ।
लागूऔषध मुद्दामा २ हजार जरिवाना र १ महिना २५ दिन कैद तोकिएका बोदे बर्साइन नगरपालिका ७ बस्ने सोभितलाल राम, वन पौदार मुद्दामा ९ महिना कैद र २ हजार १३१ जरिवाना तोकिएका कंचनरुप ११ बस्ने दिलमोहन सरदार, सोही मुद्दामा ३४ हजार ३११ जरिवाना तोकिएका खडक नगरपालिका ५ का बाचर्य चौधरीलाई पक्राउ गरिएको छ ।
तरहुत गाउँपालिका वडा नम्बर १ बाट कुटपिट मुद्दामा जरिवाना तोकिएका ९ जना पक्राउ परेका छन् । पक्राउ पर्नेमा संजय कुमार बहरखेर, चन्दन कुमार यादव, बबी कुमार यादव, कृष्ण यादव, प्रकाश कुमार यादव, शम्भु कुमार यादव, सन्तोष कुमार यादव, दिपेश कुमार यादव र रबीन्द्र कुमार यादव छन् । यी सबैलाई जिल्ला अदालतले कुटपिट मुद्दामा रु ३ हजार जरिवाना तोकेको प्रहरीको भनाई छ ।
यस्तै, छिन्नमस्ता गाउँपालिका वडा नम्बर ४ बाट कुटपिट मुद्दामै जिल्ला अदालतबाट जरिवाना तोकएका ६ जना पक्राउ परेका छन् । पक्राउ पर्नेमा महेश्वरी देवी पण्डित, शम्भु पण्डित, दिनेश पण्डित, राजेन्द्र पण्डित, प्रमानन्द यादव र नवलकिशोर यादव छन् । यी व्यक्तिलाइ रु १२८ देखि रु ५ सयसम्म जरिवाना तोकिएको प्रहरको भनाई छ ।
कुटपिट मुद्दामै राजगढ गाउँपालिका ६ बस्ने मोहित खाँ पक्राउ परेका छन् । उनलाई जिल्ला अदालतले कुटपिट मुद्दामा रु ३ हजार १२० जरिवाना तोकेको थियो ।
पक्राउ परेकाहरुलाई आईतबार जिल्ला अदालतमा उपस्थित गराइएको सप्तरी प्रहरीका प्रबक्ता एवं डीएसपी नरेश कुमार सिंहले जानकारी दिए ।
