मधेश सम्वाददाता
राजविराज, १४ माघ ।
मिथिला कप टि–ट्वान्टी क्रिकेट प्रतियोगिताको चौथो संस्करण शनिबारदेखी राजविराजमा प्रारम्भ भएको छ ।
स्थानीय महेन्द्र बिन्देश्वरी बहुमुखी क्याम्पसको खेल मैदानमा शुरु भएको प्रतियोगिताको उद्घाटन खेलमा नेपाली टोलीले भारतीय टोलीलाई पराजित गरेको छ ।
खेलमा मकवानपुर क्रिकेट टिमले भारतको बिहार राज्य अन्तर्गत सुपौल टिमलाई ८ विकेटले पराजित गर्दै विजयी यात्राको शुरुवात गरेको छ ।
टस जितेर पहिले ब्याटिङ गरेको सुपौल क्रिकेट टिम निर्धारित १८ ओभरको खेलमा ६ विकेट गुमाएर १३४ रन बनायो । १ सय ३५ रनको विजयी लक्ष्य लिएर जवाफी ब्याटिङ गर्न आएको मकवानपुर क्रिकेट टिम १७ ओभर २ बलमा लक्ष्य भेटायो ।
खेलको म्यान अफ द म्याच मकवानपुर क्रिकेट क्लबका गौरव खड्का घोषित भएको आयोजकयुवा शक्ति क्लवले जनाएको छ ।
यसअघि विष्णुपुर गाउँपालिकाका अध्यक्ष उमेश प्रसाद यादवले ब्याटिङ तथा नेपाली राष्ट्रिय क्रिकेट टोलीका म्यानेजर बिनादे दासले बलिङ तथा वडा अध्यक्ष परमानन्द यादवले विकेट किपिङ गर्दै प्रतियोगिताको उद्घाटन गरेका थिए ।
प्रतियोगिताका विजेता टिमलाई रु एक लाख नगद र ट्रफी तथा उपविजेता टिम ५० हजार नगद र ट्रफी दिइने आयोजकले जनाएको छ ।
प्रतियोगितामा छिमेकी राष्ट्र भारतका २, प्रदेश १ का ३, मधेश प्रदेशका १० र बागमती प्रदेशका १ टिमसहित १६ टिमको सहभागिता रहेको छ ।
आयोजक समितिका अध्यक्ष ई. रबिन्द्र यादवको अध्यक्षतामा भएको कार्यक्रममा छिन्नमस्ता गाउँपालिकाका अध्यक्ष विद्यानन्द चौधरी, नेपाली काँग्रेसका प्रबक्ता नन्दकिशोर यादव, नेपाल पत्रकार महासंघ, सप्तरीका अध्यक्ष श्रवण कुमार देव लगायतको उपस्थिति रहेको थियो ।
