मधेश सम्वाददाता
राजविराज, ११ माघ ।
सप्तरी प्रहरीले अदालतबाट कैद र जरिवाना तोकिएपछि फरार रहेका २२ जनालाई एकै दिन पक्राउ गरेको छ । पक्राउ पर्नेमा १८ जना एकै वडाका छन् ।
जिल्लाको कंचनरुप नगरपालिका वडा नम्बर ११ का १६ जनालाई वन पौदार मुद्दामा र अन्य ठाउँका अन्य मुद्दाका ६ जनालाई पक्राउ गरिएको प्रहरीले जनाएको छ ।
कंचनरुप नगरपालिकाका ४९ बर्षीय शम्भु चौधरी, ४८ बर्षीय श्रीराम चौधरी र ५१ बर्षीय शान्ति भनिने सन्तु सरदारलाई वन पैौदार मुद्दामा पक्राउ गरिएको छ । अदालतले यी तीनै जनालाई रु ५ हजारका दरले जरिवाना र ५ महिना २० दिन कैद तोकेको प्रहरीको भनाई छ ।
सोही मुद्दामा रु ७३० जरिवाना र ६ महिना कैद तोकिएका सोही ठाउँका ३९ बर्षीय महेन्द्र चौधरी, ५० बर्षीय जुगाई सरदार पनि पक्राउ परेका छन् ।
कंचनरुप ११ कै ५१ बर्षीय देबु सरदार, ५१ बर्षीय नेमचन चौधरी, ५९ बर्षीय नोथनी सरदार, ६१ बर्षीय बुद्धिलाल सरदार, ४० बर्षीय आशाराम सरदार, रामप्रसाद सरदार, ४९ बर्षीय सित कुमार सरदार, ५९ बर्षीय कारीबहादुर चौधरी, ४० बर्षीय जयराम सरदार र ६७ बर्षीय सुकदेव चौधरी वन पौदार मुद्दामै समातिएका छन् । यो मुद्दामा सप्तरी जिल्ला अदालतले यी व्यक्तिलाई रु २ हजार जरिवाना र ६ महिना कैद हुने फैसला सुनाएको प्रहरीले जनाएको छ ।
लुटपिट मुद्दामा कंचनरुप नगरपालिका ११ बाटै दुई जना पक्राउ परेका छन् । पक्राउ पर्नेमा ६५ बर्षीय बिनय कुमार चौधी र ६७ बर्षीय योगेन्द्र चौधरी छन् । यी दुबैलाई जिल्ला अदालतले लुटपिट मुद्दामा रु १ हजार ९५ जरिवाना गरेको प्रहरीको भनाई छ ।
जिल्लाको राजगढ गाउँपालिकाबाट जालसाज मुद्दामा अदालतबाट जरिवाना तोकिएका ४ जना पक्राउ परेका छन् । पक्राउ पर्नेमा गाउँपालिकाको वडा नम्बर ३ बस्ने ५० बर्षीय रामदेव मोची, २९ बर्षीय राजकुमार राम, डिस्को भनिने इनरजित पासवान र बैजनाथ राम छन् । जालसाज मुद्दामा यी चारै जनालाई अदालतले रु १२५ का दरले जरिवाना गरेको प्रहरीले जनाएको छ ।
आफ्नै घरआँगनबाट पक्राउ परेका उनीहरुलाई बुधबार सप्तरी जिल्ला अदालतमा उपस्थित गराइएको सप्तरी प्रहरीका प्रबक्ता एवं डीएसपी नरेश सिंहले जानकारी दिए ।
