राजविराज । सप्तरीको हनुमाननगर कंकालिनी नगरपालिकामा प्रथम टि–ट्वान्टी मेयर कप क्रिकेट प्रतियोगिता शुरु भएको छ ।
सोमबार नगरपालिकाको वडा नम्बर ४ मधवापुरमा आयोजित एक कार्यक्रमकाबीच मधेश प्रदेश सरकारका शिक्षा मन्त्री महेश यादवले प्रतियोगिताको उद्घाटन गरे ।
त्यस अवसरमा बोल्दै उनले बालबालिकालाई पढाइ सँगसँगै खेलकुद पनि आवश्यक रहेको बताए । उनले पालिका तथा विद्यालयहरुले खेलकुदको व्यवस्थता नमिलाउँदा बालबालिका अर्काे बाटोमा जान बाध्य भएकाले यसतर्फ सबैले ध्यान दिनुपर्ने बताए ।
नगरपालिकाका मेयर बिरेन्द्र माझीको अध्यक्षतामा भएको उद्घाटन खेलमा प्रदेश सांसद सकील अली, कंचनरुप नगरपालिकाका प्रमुख ललन प्रसाद गुप्ता, तिलाठी कोइलाडी गाउँपालिकाका अध्यक्ष अरुण कुमार मण्डल, बलान बिहुल गाउँपालिकाका अध्यक्ष खेमचन्द्र यादवसहितकाले मन्तव्य व्यक्ति गरेका थिए ।
प्रतियोगिताको सोमबार भएको उद्घाटन खेलमा जनप्रतिनिधी र कर्मचारीले मैत्रीपूर्ण क्रिकेट खेलेका छन् । खेलमा जनप्रतिनिधी विजयी भएको छ ।
प्रतियोगिताको उद्घाटनपछि भएको जनप्रतिनिधी र कर्मचारीको खेलमा जनप्रतिनिधीको टिम विजयी भएको हो ।
टस जितेर कर्मचारीले निर्धारित १० ओभरको खेलमा पहिला व्याटिङ गरेका थिए । त्यस क्रममा कर्मचारीको टिमले ६ विकेट गुमाएर ८३ रन बनाए । जसमा श्यामसुन्दर मण्डल २१, हरेराम यादव १९ र हरीनारायण साहले १८ रन बनाए ।
बलिङतर्फ जनप्रतिनिधीको तर्फबाट दीपेश मण्डलले २ विकेट लिए ।
प्रतिउत्तरमा ९ ओभर ४ बलमा जनप्रतिनिधीको टिम ८४ रन बनाएर विजयी भयो । त्यस क्रममा जनप्रतिनिधीको तर्फबाट अमित मण्डल ४१ र इमामुद्दिन अन्सारीले २१ रन बनाए ।
प्रतियोगितामा हनुमाननगर कंकालिनी नगरपालिकाको २ टिमसहित कंचनरुप नगरपालिका, छिन्नमस्ता, तिलाठी–कोइलाडी र रुपनी गाउँपालिकाको सहभागिता छ ।
