राजविराज । सप्तरीको छिन्नमस्ता गाउँपालिकाले नयाँ शैक्षिक सत्र शुरु भएपछि विद्यालयमा पाठ्यपुस्तक बितरण शुरु गरेको छ ।
नयाँ शैक्षिक सत्र २०८० शुरु भए लगत्तै पालिकाले विद्यालयमा पाठ्यपुस्तक पठाउन थालेको हो । सोमबार पालिकाको जनता मावि खुदिबखारीबाट पाठ्यपुस्तक वितरण शुरु गरिएको छ ।
नेपाल सरकार तथा छिन्नमस्ता गाउँपालिकाको सह्योगमा जनता माध्यमिक विद्यालय खुदिबखारी, कुपहीमा सोमबार आयोजित एक कार्यक्रमकाबीच पाठ्यपुस्तक बितरण शुरु गरिएको छ ।
विद्यालयका प्रधानाध्यापक सत्यनारायण साहको अध्यक्षता र गाउँपालिका अध्यक्ष विद्यानन्द चौधरीको प्रमुख आतिथ्यमा आयोजित कार्यक्रममा विद्यालयमा अध्ययनरत बालबालिकालाई पाठ्यपुस्तक बितरण गरिएको हो ।
त्यस अवसरमा बोल्दै पालिका अध्यक्ष चौधरीले शिक्षालाई प्राथमिकतामा राखेर काम गरिरहेको बताए । शिक्षा मजबुत भए पालिका नै राम्रो हुने बताउँदै उनले यसमा सहयोग गर्न सबैसँग आग्रह गरे ।
उनले समयमा कोर्ष सकाएर विद्यालयमा गुणस्तरीय शिक्षा प्रदान गर्न शिक्षकहरुसँग आग्रह पनि गरे । शिक्षा प्रवाह गर्ने क्रममा कुनै समस्या भए पालिका सहयोग गर्न तयार रहेको भन्दै उनले विद्यालयमा बालबालिका र शिक्षक दुबै नियमित आउनुपर्ने बताए ।
