सडक खनेर राखिएपछि पोर्ताहामा चक्काजाम

भारदह । सडक निर्माण गर्ने नाममा पछिल्लो ६ महिनादेखि खाल्डो खनेर राखिदिएको भन्दै सप्तरीको हनुमाननगर कंकालिनी नगरपालिकाका बासिन्दाले बुधबार आधा घण्टा पूर्व पश्चिम राजमार्ग अवरुद्ध गरेका छन् ।

नगरपालिकाको वडा नम्बर ३ का बासिन्दाले बुधबार बिहान ८ देखि ८ः३० बजेसम्म चक्काजाम गरेका हुन् । चक्काजामका कारण सबारीसाधन थन्किएको थियो ।

स्थानीय कंकालिनी मावि नजिक सडक खनेर ६ महिनादेखि राखिएको छ । ढल बनाउनका लागि खाल्डो खनिएका कारण हिंडडुल गर्न समस्या भइरहेको र धूलोले जनजीवन प्रभावित भइरहेकाले आफूहरु आन्दोलनमा उत्रेको स्थानीय अजय रामले बताए ।

स्थानीयले सडक अवरुद्ध गरेपछि प्रहरीले दैनिक रुपमा पानी पटाउने र ठेकेदारलाई खोजेर काम अघि बढाउने प्रतिबद्धता जनाएपछि चक्काजाम खोलिएको थियो ।