राजविराज । बारा २ बाट जसपा अध्यक्ष उपेन्द्र यादव निर्वाचित भएको खुशियालीमा निकालिएको विजयी जुलुसमा मधेशका मुख्यमन्त्री औंधी रमाएका छन् । मुख्यमन्त्री सरोज यादव हात्तीमै सबार भएर विजयी जुलुसमा सहभागिता जनाएका छन् ।
मुख्यमन्त्री यादव हात्तीमा सबार भएर सडकमा निस्केको तस्वीर अहिले सामाजिक संजालमा चर्चाको बिषय बनेको छ ।
आईतबार भएको उपनिर्वाचनमा जनता समाजवादी पार्टी (जसपा) अध्यक्ष यादव विजयी भएपछि हात्ती सहितको विजयी जुलुस निकालिएको छ ।
बारा क्षेत्र नम्बर २ मा जसपाका नेता, कार्यकर्ता, समर्थक र मधेसका मुख्यमन्त्री सरोजकुमार यादव र अन्य मन्त्रीहरुसमेत विजयी जुलुसमा सहभागी भएका थिए । उक्त जुलुसमा मुख्यमन्त्री यादव हात्तीमा सवार थिए ।
जुलुसमा प्रयोग भएको हात्ती कहाँबाट ल्याइएको हो केही खुलेको छैन । यादवको जीत ऐतिहासिक भएको भन्दै विजयी जुलुस भव्य बनाउन हात्तीसमेत प्रयोग गराएको बताइएको छ । हात्तीमा हार्दिक बधाई लेखिएको ब्यानर पनि राखिएको थियो ।
