राजविराज । नेपाली क्रिकेट टिम एसिया कपका लागि छनौट भएपछि राजविराजमा खुशियाली मनाइएको छ । खेलाडी, युवाका साथै सांसद समेतले खुशियाली मनाएका हुन् ।
देश एसिया कपजस्तो महत्वपूर्ण खेलका लागि छनौट भएपछि मंगलबार साँझ राजविराजको जनआन्दोलन चोकमा मैनबत्ति प्रज्जवलन गर्दै एकअर्कालाई मिठाई बाँडेर खुशियाली मनाइएको छ ।
युवाहरुले जनआन्दोलन चोकमा हिंडने बटुवाहरुलाई समेत मिठाई बाँडेका थिए । सप्तरी क्रिकेट संघका प्रतिनिधी तुला माझीले क्रिकेट खेलाडीले आज औधी खुशी दिलाएकाले यो कार्यक्रमको आयोजना गरिएको बताए ।
सप्तरी क्रिकेट संघको अगुवाईमा भएको उक्त कार्यक्रममा सप्तरी क्षेत्र नम्बर ३ का प्रतिनिधीसभा सदस्य दिनेश यादव, राजविराज नगरपालिकाका पूर्व मेयर शम्भु यादवसहितका नेता एवं युवा र स्थानीय खेलाडीहरुको सहभागिता रहेको थियो ।
त्यस अवसरमा बोल्दै प्रतिनिधीसभा सदस्य यादवले क्रिकेटरले देशको नाम विश्वभरी चम्काएको बताए । उनले क्रिकेटको विकासका लागि सरकारलाई गम्भीर बन्नुपर्नेमा जोड् दिए ।
