राजविराज । मिटरव्याज पीडितहरुको गुनासो सुन्न जिल्ला प्रशासन कार्यालय, सप्तरीमा छुट्टै कक्षको व्यवस्था गरिएको छ ।
मिटरव्याज पीडितको अवस्था बुझ्नलाई सहायता कक्षको स्थापना गरिएको हो । प्रमुख जिल्ला अधिकारी भूपेन्द्र थापाले मंगलबार उक्त कक्षको उद्घाटन गरेका छन् ।
त्यस अवसरमा बोल्दै थापाले कार्यालयमा अन्य कामहरु पनि भएको र मिटरव्याजपीडितको समस्या बुझ्न गाह्रो हुन सक्ने भएकाले छुट्टै सहायकता कक्षको स्थापना गरिएको बताए । उनले अब सहज तरिकाले यस्ता पीडितको समस्या सुनेर कार्वाही प्रकृयालाई अगाडि बढाउन सहज हुने बताए ।
मिटरव्याज पीडितहरुको समस्या बुझ्न सरकारले नै तदारुकता देखाइसकेकाले उनीहरुको समस्या समाधान हुने विश्वास व्यक्त गरे ।
छुट्टै स्थापना भएको सहायता कक्षमा एक जना खरीदार र एक जना कम्प्युटर अपरेटरलाई राखिनेछ । खरीदारले समस्या बुझेर निवेदन दर्ता गर्ने र कम्प्युटर अपरेटरले इन्ट्री गर्ने प्रमुख जिल्ला अधिकारी थापाले जानकारी दिए ।
उनका अनुसार मिटरव्याज समस्या समाधान सम्बन्धी आयोगले बनाएको फर्म मंगलबारदेखि नै बितरण गर्न शुरु गरिसकिएको छ ।
