राजविराज । अब जिल्ला प्रशासन कार्यालय, सप्तरीमा सेवा लिन पहिलाभन्दा सहज हुने भएको छ । शुक्रबारदेखि कार्यालयमा टोकन प्रणाली शुरु भएसँगै सेवाग्राहीलाई सेवा लिन सहज हुने भएको हो ।
स्थापना भएको टोकन मेसिनको शुक्रबार राजविराज नगरपालिकाका कार्यबाहक मेयर इसरत परबिन र प्रमुख जिल्ला अधिकारी भूपेन्द्र थापाले संयुक्त रुपमा उद्घाटन गरे ।
त्यस अवसरमा बोल्दै कार्यक्रमकी प्रमुख अतिथी परबिनले टोकन प्रणाली लागू भएपछि सेवाग्राहीलाई समयमै काम हुने विश्वास व्यक्त गरिन् । उनले राजविराजको विकासका लागि सबैले ध्यान दिनुपर्ने बताइन् ।
प्रमुख जिल्ला अधिकारी थापाले अब विचौलियाको प्रभावबाट मुक्त हुने विश्वास व्यक्त गरे । यसअघि पहिला आउने सेवाग्राही पनि विचौलियाकै कारण पछि पर्ने गरेको गुनासो आफू समक्ष आएको बताउँदै उनले अब यस्तो समस्या समाधान हुने बताए ।
राष्ट्रिय परिचय पत्र, राहदानी, नयाँ नागरिकता, नागरिकताको प्रतिलिपी र अन्य कामको अप्सन टोकन प्रणालीमा राखिएको छ । जुन कामका लागि सेवाग्राही आउँछन् त्यसैमा क्लिक गरिएपछि टोकन आउने र सोही आधारमा सम्बन्धित फाँटमा बोलाइने भएकाले जो पहिला आउने हुन उनैको काम पहिला हुने भएको छ ।
