राजविराज, ४ जेठ । पोषण सप्ताह २०८० अन्तरगत सेभ द सप्तरीले आफना कार्यक्षेत्रमा पर्ने सम्पुर्ण सामुदायिक बिद्यालयमा बिभिन्न कार्यक्रम संचालन गरेको छ । सेभ द चिल्ड्रेन, सेभ द सप्तरीको प्राबिधिक सहयोगमा नगरपालिका, गाउँपालिका तथा बिद्यालयको आयोजनामा जिल्लाको राजविराज नगरपालिका वडा नं. १,५,१४,१५ र १६ वडा तथा छिन्नमस्ता,बिष्णुपुर र तिलाठी कोइलाडी गाउँपालिकाको प्रत्येक सामुदायिक बिद्यालयमा अहिले पोषण सप्ताह अन्तरगतका बिभिन्न कार्यक्रमहरु संचालन भइरहेको छ । नेपाल सरकारले मनाउदै आएको कार्यक्रम अनुसार यही जेठ १ गतेदेखि जेठ ७ गते सम्म संचालन रहने पोषण सप्ताह कार्यक्रम करिब ६३ वटा सामुदायिक बिद्यालयमा अहिले हर्ष उल्लास तथा उत्साहपुर्णरुपमा भइरहेको सेभ द सप्तरीका फिल्ड अधिकृत बिष्णुकान्त देवले जानकारी दिए । पोषण सप्ताह अन्तरगत पहिलो दिन पोषण सामग्री प्रर्दशनी,दोश्रो दिन बिद्यालय तथा अभिभावकहरुको लागि पोषणयुक्त खाद्य सामग्रीको उचित प्रयोग सम्बन्धि कक्षा संचालन गरिएको छ । यस्तै तेश्रो र चौथो दिन बिहिवार कक्षा १ देखि ८ सम्मका बालबालिकाहरुको आँखा जाँच,कान र दातको जाँच तौल मापन गरि उमेर अनुसार बृद्धिबिकास भए नभएका छुटयाइको र सम्पुर्ण १ कक्षादेखि १० सम्मका विद्यार्थिहरुलाई जुकाको औषधी खुवाई चौथो दिन सम्म पोषण सप्ताहको कार्यक्रम सम्पन्न गरिएको छ । त्यस्तै छिन्नमस्ता गाउँपालिकामा सामुदायिक तथा निजी बिद्यालयमा समेत स्थानिय स्वास्थ्य चौकिका स्वास्थ्य कर्मचारी समेत खटाइएपछि कार्यक्रममा बिद्यार्थी भाइबहिनीहरुको उत्साहपुर्ण सहभागिता रहेको देखिएको छ । यसैबिच सेभ द सप्तरीको समुन्नती कार्यक्रम बिद्यालय स्वास्थ्य तथा पोषण सप्ताह अरु बाँकी कार्यक्रम समेत अहिले पनि जारि नै रहेको छ ।
