राजविराज । जिम्बाबेमा हुने विश्वकप क्रिकेटको छनौट खेल्ने नेपाली टोलीको घोषणा गरिएको छ । आगामी असार महिनामा विश्वकप क्रिकेट छनौट खेल हुनेछ जसमा नेपालसहित १० राष्ट्रको सहभागिता रहनेछ ।
आईतबार नेपाल क्रिकेट संघ क्यानले १६ सदस्यीय टोली घोषणा गरेको छ । टोलीमा विकेट किपर अर्जुन साउद फर्किएका छन् ।
रोहित पौडेलको कप्तानीमा रहेको टोलीमा कुशल भुर्तेल, आशिफ शेख, कुशल मल्ल, आरिफ शेख, दिपेन्द्रसिंह ऐरी, गुल्सन झा, सोमपाल कामी, करण केसी, भीम सार्की, प्रतिस जिसी, ललितिनारायण राजवंशी र किशोर महतो रहेका छन् ।
पूर्व कप्तानहरु सन्दीप लामिछाने र ज्ञानेन्द्र मल्लले पनि टोलीमा नियमित स्थान बनाएको क्यानले जनाएको छ ।
उक्त प्रतियोगितामा नेपालसँगै विश्वकप विजेता श्रीलंका र वेस्टइन्डिजसहित अमेरिका, युएई, स्कटल्याण्ड, आयरल्याण्ड, जिम्बाबे, ओमान र नेदरल्याण्डले प्रतिस्पर्धा गर्नेछ । शिर्ष दुई टोलीले विश्वकप खेल्नेछ ।
