राजविराज । आफ्नो पत्नी हुँदाहुँदै अर्काे विवाह गर्ने सुनसरीका एक व्यक्तिलाई सप्तरी जिल्ला अदालतले पुर्पक्षका लागि कारागार पठाउन आदेश दिएको छ ।
सुनसरीको इटहरी उपमहानगरपालिका वडा नम्बर ७ बस्दै आएका ३९ बर्षीय रंजीत कुमार झालाई सप्तरी जिल्ला अदालतले बहुविवाह मुद्दामा पुर्पक्षका लागि कारागार पठाउने आदेश दिएको हो ।
न्यायाधीश डा. राजेन्द्र कुमार आचार्यको इजलासले झालाई पुर्पक्षका लागि कारागार पठाउने आदेश दिएसँगै उनलाई राजविराज कारागार पठाइएको छ ।
झालाई गत शुक्रबार प्रहरी र स्थानीयको सहयोगबाट इटहरीस्थित घरबाटै पक्राउ गरिएको थियो । उनलाई सप्तरी जिल्ला अदालतमा आईतबार पेश गर्दा अदालतले पुर्पक्षका लागि कारागारमा पठाउने आदेश दिएको हो ।
झाले ५ माघ, २०६७ मा रौतहटको गौर नगरपालिका वडा नम्बर १ की बन्दना कुमारी झासँग सामाजिक परम्परा अनुसार विवाह भएको थियो । बन्दनासँग उनका दुई सन्तानको जन्म समेत भएको थियो ।
आफ्नै पत्नी र दुई सन्तान हुँदाहुँदै पनि उनले २०७९ सालमा सप्तरीको तिलाठी कोइलाडी गाउँपालिका १ निवासी २८ बर्षीया दुर्गा झासँग विवाह गरेपछि जेठी पत्नी बन्दनाले प्रहरीमा बहुविवाहको जाहेरी दिएकी थिइन् ।
