सप्तरीमा मतदातालाई पैसा बितरण गर्ने क्रममा तीन जना समातिएका छन् ।
तिलाठी कोईलाडी गाउँपालिका वडा नम्बर ५ स्थित बनरझूल्लाबाट आईतवार राती ९४ हजार नगद सहित तीन जनालाई प्रहरीले पक्राउ गरेको हो ।
पक्राउ पर्नेमा सोही गाउँपालिका वार्ड नम्बर ४ बस्ने सुरज कुमार सिंह, वडा नम्बर ६ बस्ने जयप्रकाश सिंह र वडा नम्बर ८ बस्ने मनोज कुमार झालाई नगद सहित पक्राउ गरिएको जिल्ला प्रहरी कार्यालय सप्तरीका प्रहरी प्रवक्ता माधव प्रसाद काफ्लेले जानकारी दिए ।
पक्राउ परेका मध्ये सुरज लोसपाबाट अध्यक्ष पदका उम्मेदवार एवं निवर्तमान अध्यक्ष सतिश कुमार सिंहका भाई हुन् । उनीहरु स१च ११११ नम्बरको निलो स्कारपियोमा पैसा लिएर सो स्थानमा राति साढे नौ बजे पुगेका थिए ।
पक्राउ परेका तीनै जना र नगद सहित आवश्यक कारवाहीका लागि जिल्ला निर्वाचन अधिकृतको कार्यालय पठाईएको जिल्ला प्रहरी कार्यालय सप्तरीले जनाएको छ ।
उक्त गाडी बनरझुल्लामा पुगेपछि स्थानियहरुले रोकेर नियन्त्रणमा लिएका थिए । उनीहरुले पहिला आफै गाडी सर्च गर्न खोजे तर त्यो हुन नसेपछि प्रहरीलाई फोन गरेर बोलाए । प्रहरीले गाडी सर्च गर्दा मनोज झाको साथबाट ८० हजार र अरुको साथबाट १४ हजार गरी ९४ हजार रकम बरामद भएको वडा नम्बर ५ का कार्यवाहक वडा अध्यक्ष सीताराम रायले बताए ।
लोसपाका उम्मेदवार सतिशका लागी उनका भाई सुरज सहितका व्यक्ति मतदातालाई पैसा वाँड्न आएको साहले जानकारी दिए । ‘अरु ठाउँमा भोट किन्न एजेण्ट र ठेकेदारहरुलाई पैसा बाँड्दै यहाँ आएपछि स्थानियले गाडी नियन्त्रमा लिएर नेपाल प्रहरी, सशस्त्र प्रहरी सबैलाई फोन गरेर बोलाए पछि सर्च गर्दा मनोज झाले अण्डरवियर भित्र लुकाएर राखेको ८० हजार बरामद गरिएको हो’ वडा अध्यक्ष रायले भने ।
पैसा भएका उम्मेदवारहरुले यसरी नै अनेक प्रकारले निर्वाचन आचार संहिताको धज्जी उडाउँदै आएको रायको भनाई छ ।
