राजविराज । सप्तरी सदरमुकाम राजविराजस्थित कारागारको अतिक्रमित जग्गा खाली गर्न एक महिने सूचना जारी गरिने भएको छ ।
कारागारकाे जग्गा अतिक्रमण सम्बन्धमा जिल्लाका राजनीतिक दलसँग जिल्ला प्रशासन कार्यालयमा सोमबार आयोजित छलफलले यस्तो निर्णय गरिएको छ ।
कारागारको राजविराज ६ स्थित कित्ता नम्बर ४१५ को २ बिघा ८ कट्ठा १६ धुर जग्गामध्ये १ बिघा ६ कठ्ठा १२ धुर लामो समयदेखि अतिक्रमण गरिएको छ । जग्गा अतिक्रमण गरि केही ब्यक्ति घर बनाएर बस्दै आएका छन् ।
अतिक्रमण जग्गा विभिन्न मितिमा हटाउन सूचना पनि जारी भएको र हाल कारागार भवन जिर्न भई निर्माण गर्न कठिनाइ भएको हुँदा १ महिने सूचना दिई खाली गराउने निर्णय भएको छ । खाली गराई अतिक्रमित भएको जग्गाको संरक्षण, सम्बर्द्धन गर्दै उपभोग गर्नेगरी सबैले आवस्यक सहयोग गर्ने निर्णय भएको प्रमुख जिल्ला अधिकारी भुपेन्द्र थापाले जानकारी दिए ।
बैठकले कारागारको जग्गाभित्र बसोबास गर्ने भुमिहिन, सुकुम्बासीको अन्यत्र घर भए/नभएको एकिन गरि नभएको पाइए भूमी आयाेगलाई जग्गा प्रदानमा पहल गर्ने निर्णय पनि भएको थापाले बताए ।
यस्तै, कारागारको अतिक्रमित जग्गामा बसोबास गरिरहेका भूमिहीन, सुकुम्बासी पहिचान गर्ने समिति गठन गरिएको छ ।
सहायक प्रमुख जिल्ला अधिकारीको संयाेजकत्मा गठन भएकाे समितिमा नापी अधिकृत, जिल्ला न्यायाधिबक्ता, मालपोत अधिकृत र राजविराज नपा वडा नम्बर ६ का अध्यक्ष सदस्य छन् ।
