राजविराज । सप्तरीका पालिका प्रमुखहरुले नदी, खोलामा बालुवाको सतह धेरै माथि आएका कारण बाढीकाे समस्या देखापरेको बताएका छन् । उनीहरूले नदी र खाेलाबाट बालुवा उत्खनन गरिनुपर्नेमा जोड दिएका छन् ।
जिल्ला प्रशासन कार्यालयमा सोमबार आयोजित विपद सम्बन्धी बैठकमा बोल्दै पालिका प्रमुखहरुले यस्तो जोड दिएका हुन ।
बैठकमा हनुमाननगर कंकालिनी नगरपालिकाका प्रमुख बिरेन्द्र माझीले नदीहरुमा बालुवाकाे सतह धेरै माथि आइसकेको बताए । उनले बालुवा माथि आउँदा सामान्य बर्षामा पनि महुली खोलाको पुल हुँदै पानी बग्ने गरेको बताए । यो खोलाको पानी बस्तीमा छिरिरहेको उनले बताए ।
यसअघि महुली खोलाबाट बालुवा झिक्ने निर्णय भएपनी कार्यान्वयन नभएको उनले बताए । ‘हामीले बालुवा झिक्न २ वटा ट्याक्टर पठाउदा प्रहरीले समातयो’ उनले भने, ‘५/५ हजार जरिवाना तिराएर छडियो ।’
सिंचाइ कार्यालयका प्राविधिकले ५० मिटर बालुवा निकाल्न सुझाव दिएपनी कार्यान्वयन नगर्दा आमाया भएको उनले सुनाए । याे बालुवा झिकेर विपतमा पनि काम गर्न सकिने उनको भनाई छ।
सप्तकोसी नगरपालिकाका प्रमुख कृष्ण ढकालले
गंगाजलीसहितका बालुवा थुप्रिएर खोलाको पानी बस्तीमा पस्न थालेको बताए । सम्बन्धित निकायले बालुवा झिक्न सुझाव दिएपनि निकाल्न अनुमति नदिंदा बस्ती डुबानमा परिरहेको उनलेे बताए ।
कंचनरूप नगरपालिकाका प्रमुख ललन प्रसाद गुप्ताले पालिकाभित्रको पौडाहा, सुन्दरीजस्ता खोला नदीमा बालुवाको सतह बढिसकेको बताए । उनले बालुवा ननिकाले बाढीको चपेटामा पर्न सक्ने बताए ।
बैठकमा बालुवा ननिकाल्दा डुबान हुने देखिएमा स्थानीय विपद् व्यवस्थापन समितिबाट ढुँगा, बालुवा, गिट्टी उत्खनन, बिक्री तथा व्यवस्थापन सम्बन्धी मापदण्ड २०७७ बमोजिम रही इआए/आइइ गरि स्थानीय विपद व्यवस्थापन समितिमा साेही व्यहाेरा खुलाई निर्णय गराई जिल्ला विपद ब्यबस्थापन समितिमा सिफारिस गरि निर्णयको लागि पठाउने निर्णय भएको छ ।
ठेकेदारले काम नगरेको गुनासो
पालिका प्रमुखहरूले सडक निर्माणदेखि खोला, नदीमा काम गर्ने जिम्मा लिएका ठेकेदारले समयमा काम नगरिदिदा समस्या भोग्नुपरेको सुनाए ।
डाक्नेश्वरी नगरपालिकाका प्रमुख रामलखन मुखियाले ठेकेदारले समयमा काम नगरिदिदा समस्या भएको बताए । समयमा काम नहुदा बाटोमा हिड्न मुस्किल भैरहेको बताए ।
तिलाठी कोइलाडी गाउँपालिकाका अध्यक्ष अरुण मण्डलले आफ्नो पालिका जिल्लामै बढी बाढी जाने रहेकाे बताए । वडा नम्बर ३,४,५ र ७ बाढीकाे उच्च जाेखिममा रहेको बताउँदै उनले जीता र महुली खाेलामा सिंचाइ कार्यालयका प्रतिनिधिसङ अनुगमन गराउदा कुनै काम नगरिदिएको गुनासो गरे ।
बलानबिहुल गाउँपालिकाका अध्यक्ष खेम्चन्द्र यादवले
बलान खाेलाकाे बाँध भत्केर ३०० घर डुबानमा परेको बताए ।
‘बाँध भत्किएपछि सिंचाइ कार्यालयले बोरा दिइरहेको छ । बालुवा भर्ने रकम दिइरहेको छैन’ उनले भने, ‘फोटो खिचाउन धेरै आएपनि आफूसँग कुनै सहकार्य गरिएन ।’
छिन्नमस्ता गाउँपालिकाका अध्यक्ष विद्ययानन्द चौधरीले १८ पालिका प्रमुख र सिडिओसङ बैठक बसेर मलखाध पारदर्शी गर्न सहमति भएपनि कार्यान्वयन नभएको बताए ।
उनले रुपनी न्यौर सडक निर्माण गर्ने ठेकेदारले अहिलेसम्म कामबारे कुनै जानकारी नगराएको र होडिङ बोर्ड समेत नराखेको बताए ।
रुपनी गाउँपालिकाका अध्यक्ष दिनेश कुमार यादवले विपदकाे सवालमा सबै सराेकारबालालाई सकृय हुनुपर्ने बताए ।
