राजविराज । सप्तरीकाे बिष्णुपुर गाउँपालिकाका अध्यक्ष सहित तीन जनाविरुद्ध भ्रष्टाचार मुद्दा दायर भएको छ ।
अख्तियार दुरुपयोग अनुसन्धान आयोगले गाउँपालिकाका अध्यक्ष उमेश प्रसाद यादव, लेखापाल टेक नारायण यादव र कम्प्युटर अपरेटर बिरेन्द्र यादवविरुद्ध मंगलबार विशेष अदालतमा मुद्दा दायर गरेकाे हाे ।
उनीहरू उपर बिगो रु.५,००,०००।- कायम गरी घुस/रिसवत लिई भ्रष्टाचार गरेको सम्बन्धी आरोप-पत्र दायर गरिएको अख्तियारले जनाएको छ ।
अख्तियार दुरुपयोग अनुसन्धान आयाेगले यसअघि नै अध्यक्ष यादवलाई नियन्त्रणमा लिएर विशेष अदालतबाट म्याद थप गराए सँगै उनी निलम्बनमा परिसकेका छन् ।
घुस रकमसहित पक्राउ परेका गाउँपालिकाका लेखापाल र कम्प्युटर अपरेटरको बयानको आधारमा अध्यक्ष यादवलाई ७ साउनमा नियन्त्रणमा लिएको थियो ।
अध्यक्ष यादवलाई नियन्त्रणमा लिई ईटहरी लगिएपनि बिरामी परेपछि काठमाडौं लगिएको छ ।
गत ३१ साउनमा गाउँपालिकाका लेखापाल टेकनारायण यादव र कम्प्युटर अपरेटर वीरेन्द्र यादवलाई राजविराजको गजेन्द्र चौकबाट २ लाख रुपैया नगद र ३ लाखको चेकसहित अख्तियारको टोलीले नियन्त्रणमा लिएको थियो । पक्राउ परेका यी दुबैले अध्यक्षकै इसारामा घुस लिएको बयान दिएका छन् ।
