राजविराज । सप्तरी प्रहरीले चाडपर्व लक्षित विशेष सुरक्षा कार्य योजना बनाएको छ । दशैं, दीपावली तथा छठ पवैलाई मध्यनजर गर्दै विशेष सुरक्षा कार्ययोजना बनाइएको जिल्ला प्रहरी कार्यालय, सप्तरीले जनाएको छ ।
जिल्ला प्रहरी कार्यालयका प्रमुख एसपी गजुसिद्दि बज्राचार्यले कुनै पनि अपराधिक घट्नाको सूचना पाए लगत्तै ५ देखि ७ मिनेटभित्रमा पुग्ने गरी प्रहरी परिचालन गर्ने किसिमले सुरक्षा योजना बनाइएको बताए । त्यसका निम्ति जिल्लामा पोशाकमा र बिना पोशाकका ६९० प्रहरी खटिने उनले बताए ।
चाडपर्वको समयमा सामाजिक अपराध, चोरी, बलात्कार, मानव बेचबिखन, जुवाजन्य खेलहरु, पिक पकेटिङ, लुटपाट, मदिरा सेवन, कालोबजारी लगायतका घट्नामा वृद्धि हुने हुँदा समुचित ढँगले प्रहरी परिचालन गरिने उनले बताए ।
अपराध नियन्त्रणका लागि पैदल, साइकल, मोटरसाइकल, पेट्रोलिंग गाडी, पिकेट, क्यूआरटी, एम्बुस परिचालन गरिने र प्रमुख चोकहरुमा चेकिङको व्यवस्था मिलाइनेछ । रिजर्भ टोली, स्टेण्डबाई टोली र कमाण्ड पोष्टको व्यवस्था गरी २४ औं घण्टा सुरक्षा व्यवस्था मिलाइनेछ ।
यस्तै, सिमानाकामा कडाई, यात्रु सहायता कक्षको स्थापना गरी यात्रुसँग बढी भाडा लिने, सिट क्षमताभन्दा बढी यात्रु राख्नेलाई कार्वाही गर्ने योजना प्रहरीले बनाएको छ ।
चाडपर्व लक्षित सुरक्षा योजना अनुसार जिल्लाभरि रहेका सबै प्रहरी युनिटले अन्य सुरक्षा निकायसँग समन्वय गरी सबारी व्यवस्थापन, आर्थिक कारोबार हुने स्थानहरुको सुरक्षा, मदिरा नियन्त्रण, मेला पर्व तथा विशेष धार्मिक स्थलको सुरक्षा, सीमावर्ती अपराध तथा भन्सार छली, चोरी तस्करी नियन्त्रण गर्ने, यात्रु सहायता कक्ष निर्माण गर्ने, झैं–झगडा, जुवातास, मापसे नियन्त्रण, सहकार्य र समन्वय गर्ने योजना बनाइएको छ ।
