राजविराज । नेपालका प्रधानमन्त्रीले शिलान्यास गरेको रामराजा स्वास्थ्य विज्ञान प्रतिष्ठान अबिलम्ब निर्माण हुनुपर्ने माग राख्दै थालिएको आन्दोलन १९ दिन पूरा गरेको छ ।
प्रतिष्ठान निर्माणको माग गर्दै स्थानीय संघर्ष समिति बनाएर रिले अनसन शुरु गरेका छन् । १९ दिनदेखि रिले अनसनमा नियमित सहभागी हुँदै आएकाहरु बिरामी पर्न थालेका छन् । १९ औं दिन मंगलबार रिले अनसनमा लगातार सहभागी भएका ५५ बर्षीय डम्बरनारायण यादव र ५७ बर्षीय ब्रहमदेव यादव बिरामी परेका छन् ।
मंगलबार नेपाल पत्रकार महासंघको एक टोली पुग्दा यी दुबैलाई अनसनस्थलमै स्लाइनपानी चढाइएको थियो ।
‘उहाँहरु नियमित अनसनमा सहभागी हुँदै आउनुभएको छ’ संघर्ष समितिका संयोजक रामकुमार दासले भने, ‘दुई दिन यता उहाँहरु बिरामी पर्नुभएको छ ।’
स्लाइन पानीबाहेक उनीहरुलाई औषधि पनि दिनुपरेको उनले बताए ।
अनसन बस्नेहरु राजविराज नगरपालिका वडा नम्बर १० का हुन् । यहीं वडाको बिरौलमा तत्कालिन प्रधानमन्त्री केपी शर्मा ओलीले राजविराज स्वास्थ्य विज्ञान प्रतिष्ठान शिलान्यास गरेका थिए । २२ असार २०७८ मै ओलीले भर्चुअल माध्यमबाट शिलान्यास गरेपनि काम अझै अघि बढ्न सकेको छैन् ।
प्रतिष्ठान निर्माणस्थलमा बोर्ड राख्ने, जग्गा तारजालीले घेरबार गर्ने र डिपिआर बनाउनेबाहेक अन्य काम अघि बढ्न सकेको छैन् ।
बिरामी परेका अनसनकारी डम्बरनारायण यादवले बिरामी परेपनि प्रतिष्ठानको काम पूरा गराउन नियमित संघर्ष गरिरहने बताए । उनले सरकारले घोषणा गरेर शिलान्यास समेत गरिसकेको अवस्थामा काम शुरु नहुनु बिडम्बना भएको बताए ।
