राजविराज । विश्वको अरु देश झैं अहिले नेपाली क्रिकेटको चर्चा छ । अन्तर्राष्ट्रिय जगतमा अहिले नेपालले क्रिकेटकै माध्यमले ख्याती कमाएको छ । अहिले एशियास्तरीय टि–ट्वान्टी विश्वकप क्रिकेट छनौट प्रतियोगिता हाम्रै देशमा भइरहेको छ ।
यो प्रतियोगिताको शुरुवाती दुई खेल जितेको नेपाल समूह चरणको अन्तिम खेलमा ओमानसँग ५ रनले पराजित भयो । रोमाञ्चक खेलमा हारेको नेपालका लागि हिरो भए विवेक यादव ।
नचिन्ने व्यक्तिका लागि विवेक को हुन ?, कहाँका हुन् ? भन्ने जिज्ञासा लाग्न सक्छ । विवेक सप्तरीबासी हुन् । सदरमुकाम राजविराज नगरपालिका निवासी विवेक समूह चरणको अन्तिम खेलमा ओमानबिरुद्ध गज्जबको प्रदर्शन गरे । हार्नै लागेको खेललाई अन्तिम ओभरमा ट्रयाका ल्याएपनि जिताउन सकेनन् ।
अन्तिम चरणमा बोलाइएका विवेकलाई उनले सम्झनलायक प्रदर्शन गरे । २४ बलमा ३९ रन बनाएका विवेक अन्तिम ओभरमा लगातार ३ छक्का प्रहार गरे । तर उनले देशलाई जिताउन सकेनन् ।
आफ्ना पुत्रको प्रदर्शनले हौस्सिएपनि खुशी हुन सकेका छैनन् उनका पिता बिरेन्द्र यादव । ‘मेरो छोराले आज धेरै राम्रो प्रदर्शन गरे, तर देशलाई जिताउन सकेनन्’ बिरेन्द्रले भने, ‘यसका निम्ति दुःखी छु ।’
आफ्ना छोरालाई क्रिकेटर बनाउन निक्कै दुःख भोगेका बिरेन्द्रले भने, ‘विवेकलाई माथिल्लो क्रममा व्याटिङ गर्न बोलाएको भए देश जित्ने थियो ।’
उनले व्याटिङ अर्डरमा नेतृत्वकर्ताले गल्ती गरेको बताए । ‘सोमपाल कामी, सन्दीप लामिछानेलाई पहिला नै बोलाएर गल्ती गरिएको छ’ उनले भने, ‘विवेकलाई शुरुमा व्याटिङका लागि बोलाउँदा अझै राम्रो हुन्थ्यो ।
बिरेन्द्र पनि खेलाडी हुन् । तर, भलिवलका । उनले विवेकलाई क्रिकेटर बनाउन धेरै मिहिनेत गरेको बताए । छोराले आज पाएको मौकालाई सदुपयोग गर्दै आफ्नो गुणलाई प्रष्टफुटित गरेको बताउँदै उनले नेपाल फाइनलमा पुग्ने विश्वास व्यक्त गरे ।
‘नेपाल फाइनलमा गुपेर टि–ट्वान्टी क्रिकेट प्रतियोगितामा छनौट हुन्छ भन्ने विश्वास छ’ उनले भने, ‘नेपाल विश्वकपमा छनौट भए शिबजीको ठूलै पूजा गर्ने भाकल गरेको छु । बाबा बैद्यनाथ धाम गएर पूजा गर्छु ।’
