राजविराज । अब सप्तरीमा पनि आमाको नामबाट नेपाली नागरिकता बन्ने भएको छ ।
जिल्ला प्रशासन कार्यलयले आमाको नामबाट नागरिकताका लागि सिफारिस लिन जाने सेवाग्राहीलाई सिफारिस गरी पठाइदिन भनेको छ ।
गैर आवासीय नेपाली तथा आमाको नाममा नागरिकताको लागि सिफारिस लिन कार्यालयमा आउने सेवाग्राहीलाई विस्तृत रुपमा पहिचान गरेर मात्र सिफारिस गर्न जिल्ला प्रशासन कार्यालयले सबै स्थानीय तहलाई पत्राचार गरेको छ ।
‘प्रमुख जिल्ला अधिकारीको अध्यक्षतामा नगरपालिका÷गाउँपालिकाका प्रमुखको उपस्थितिमा यहीं निर्णय भएकोले यसको कार्यान्वयनको लागि आदेशानुसार अनुरोध छ’प्रशासकीय अधिकृत भीमराज बस्नेतद्धारा हस्ताक्षरित पत्रमा भनिएको छ ।
सिफारिस गर्नुपर्ने अनुसूचीका लागि नेपाली नागरिकता (तेस्रो संशोधन) नियमावली, २०६३ को अनुसूची ४क र ४ख (बुवा पहिचान नभएको व्यक्तिको लागि) तथा अनुसूची ८ग, ८घ, ८च र ९ (गैर आवासीय नेपालीको लागि) लाई प्रयोगमा ल्याई सिफारिस गरी पठाउन पत्र मार्फत् स्थानीय तहसँग अनुरोध गरिएको छ ।
