राजविराज । मैथिली विकिपिडिया नवौं बर्षमा प्रवेश गरेको छ ।
नवौं बर्षको अवसरमा बुधबार सप्तरी सदरमुकाम राजविराजसहित बिभिन्न ठाउँमा कार्यक्रमको आयोजना गरिएको छ ।
बार्षिकोत्सवको अवसरमा राजविराजमा आयोजना गरिएको कार्यक्रमका बक्ताहरुले आफ्नो मातृभाषा मैथिलीलाई विकिपिडयासम्म जोड्नु ठूलो उपलब्धी भएको भन्दै भाषाको विकासका लागि सबैलाई अग्रसर हुनुपर्ने बताए ।
कार्यक्रमका प्रमुख अतिथी नेपाल पत्रकार महासंघ, सप्तरीका अध्यक्ष श्रवणकुमार देवले मैथिली भाषाको संरक्षण, सम्बद्र्धन र विकासका निम्ति सप्तरीकै युवाले देखाएको अग्रसरता अतुलनीय रहेको बताए ।
भारतमा ३ करोडभन्दा बढी मैथिलीभाषी भएपनि प्रविधिसँग भाषालाई जोड्न त्यहाँका भाषिक अगुवाले ध्यान नदिएपनि झण्डै २७ लाख मैथिलीभाषी रहेको नेपालका युवाले गरेको प्रयास सह्रानीय भएको उनले बताए ।
विकिपिडियामा मैथिली जोडेपनि स्थानीयस्तरमा भाषाको संरक्षण र विकासका लागि युवाहरुले नै भूमिका खेल्नुपर्ने उनले बताए । पछिल्लो जनगणनामा मैथिलीभाषीको संख्या घटेकोप्रति चिन्ता व्यक्त गर्दै उनले यसमा सरोकारबाला गम्भीर बन्नुपर्ने बताए ।
कार्यक्रममा मैथिली विकिपिडयाका उपाध्यक्ष विप्लव आनन्दले नवौं बर्ष प्रवेशको अवसरमा मिथिला दर्शन फोटो वाकको शुभारम्भ गरिएको बताए ।
मैथिली विकिपिडयाका अगुवा संजोग देवले मिथिला क्षेत्र धेरै फराकिलो रहेको र यस क्षेत्रमा ऐतिहासिक, पौराणिक स्थलहरु रहेका कारण त्यसलाई समेट्न यो अभियान शुरु गरिएको बताए ।
मैथिली विकिपिडयाका अध्यक्ष पंकज देवको अध्यक्षतामा आयोजित कार्यक्रममा कोषाध्यक्ष निलम कर्णसहितकाले बोलेका थिए ।
अध्यक्ष देवका अनुसार राजविराजसहित जनकपुरधाम, काठमाडौं, झापा र उदयपुरमा समेत बार्षिकोत्सव मनाइएको छ ।
