राजविराज ।
जनता समाजवादी पार्टी सप्तरीमा केही नेताहरुको सक्रियतामा समानान्तर समिति गठन भएपछि उक्त कार्यमा संलग्न भएकाहरुमाथि कारबाही गरिने भएको छ ।
जसपा सप्तरीका अध्यक्ष केदार यादवले आज शनिबार राजविराजमा पत्रकार सम्मेलनको आयोजना गर्दै पार्टीको विधान विपरित समानान्तर समिति गठन गराउने र समितिमा रहेकाहरुमाथि कारबाही प्रक्रिया अगाडी बढ्ने जानकारी दिए ।
अध्यक्ष यादवले जिल्ला कार्यसमितिको बैठकले विधान बमोजिम सुरुमा स्पष्टिकरण सोधिने र त्यसपछि सोही बमोजिम थप कारबाही अगाडी बढाउने बताए ।
तीन दिनअघि जसपाका केन्द्रीय कार्यकारिणि सदस्य रेणुकुमारी यादव, राजनीति समितिका सदस्य शैलेन्द्रप्रसाद साह, मधेस समितिका निर्वतमान उपाध्यक्ष शम्भु झासहितको अगुवाईमा सप्तरी समितिका उपाध्यक्ष उमेशप्रसाद यादवको संयोजकत्वमा ५७ सदस्यीय जिल्ला समानान्तर समिति गठन भएको थियो ।
गत संघीय सांसद्को निर्वाचनमा सप्तरी २ बाट जसपाका केन्द्रीय अध्यक्ष उपेन्द्र यादव जनमत पार्टीका अध्यक्ष सीके राउत संग भारी मतले पराजित भएपछि जसपाभित्र अध्यक्षलाई सहयोग नभएको विषयलाई लिएर चुनावी नतिजासँगै विवाद सुरु भएको हो ।
यसै आधारमा यसअघि नै जिल्ला तथा प्रदेश समितिको सिफारिशमा सप्तरीका विभिन्न तहमा रहेका आफ्ना नेता कार्यकर्तालाई जसपाले कारबाही गरिसकेको छ ।
उता जसपाको विवाद सप्तरीमा मात्रै नभई पर्सा जिल्लामा पनि देखिएको छ । त्यहाँ डेढ महिनाअघि संघीय सांसद् प्रदिप यादवको अगुवाईमा बहुदरमाई नगरपालिकाका मेयर सिंहासन साह तेलीको अध्यक्षतामा अर्को समानान्तर समिति गठन भएको छ ।
