शैलेन्द्र कुमार सिंह
राजविराज । राजविराज नगरपालिका वडा नम्बर ७ स्थित चण्डी भगवती मन्दिर छ । सप्तरीकै चर्चित यो मन्दिरको प्राङ्गणमा एउटा धर्मशाला निर्माण गरिएको छ । उक्त धर्मशालाको नाम हो, ’बासुदेव मिस्त्री स्मृति धर्मशाला ।’
राजविराज ७ निवासी स्वर्गीय मिस्त्री बासुदेवको स्मृतिमा उनकै छोरा देबेन्द्रले धर्मशाला बनाएका छन् । मन्दिरमा आउने भक्तजन र पुजारीलाई लक्षित गरि देबेन्द्रले यो धर्मशाला निर्माण गरिदिएपनि उनले आफै यो धर्मशाला कब्जा गरेका छन् ।
देबेन्द्रले आफ्नो पिताको नाममा निर्माण गरेको एक कोठे धर्मशालामा ताला हालेर उनले आफै चावी राखेका छन् । यहाँसम्म कि दशैमा पुजापाठ गर्न भिड लागेपनी उनले कोठा खोलिदिएनन ।
वडा नम्बर ७ का अध्यक्ष सुभाष यादवकै नेतृत्वमा कोठाको चावी माग्न जाँदा पनि नदिइएको पूजा समिति सदस्य रामनारायण मेहताले जानकारी दिए ।
’मन्दिर सार्वजनिक ठाउँ हो, यहाँ आफ्नो परिवारका दिवङ्त ब्यक्तिको नाममा धर्मशाला बनाउने र आफै प्रयोग गर्ने काम निन्दनीय हो’ वडा अध्यक्ष यादवले भने, ’बरु मन्दिर प्राङ्गणमा नबनाएको भए हुन्थ्यो ।’
मन्दिरमा धर्मशाला निर्माण गरि आफै प्रयोग गर्नु सार्वजनिक सम्पत्तिको दुरुपयोग भएको उनले बताए ।
जातीय समितिको कार्यालय
देबेन्द्रले धर्मशालाको भवन कब्जा गरि आफ्नो जातीय संगठन विश्वकर्मा लोहार सेवा समितिको कार्यालय खोलेका छन् ।
२०५७ सालमा निर्माण गरिएको धर्मशाला भवन शुरुदेखी दाता परिवारले नै कब्जा गरेको पुजा समितिका संयोजक रमानन्द देवले बताए ।
लोहारको अर्को मनोमानी
चण्डी भगवती मन्दिरको प्राङ्गण केहि फराकिलो छ । यहीँ ठाउँमा देबेन्द्रका स्वर्गीय पिता बासुदेवले विश्वकर्मा मन्दिर निर्माण गरेका छन् ।
तर मन्दिरमा लामो समयदेखि रंगरोगन समेत हुन सकेको छैन् । मन्दिर समेत जिण बन्दै गएको छ । मिस्तरी परिवारले विश्वकर्मा मन्दिरको पुजारी आफै राखेका छन् । ती पुजारी बिहान आई पूजा गरेर ताला लगाई जाने गर्छन् ।
आफ्ना परिवारको नाममा सार्वजनिक ठाउँमा भवन निर्माण गर्नु र आफै प्रयोग गर्नु अत्यन्तै गलत कार्य भएको वडा अध्यक्ष यादवले बताए ।
यस सम्बन्धमा देबेन्द्रसँग सम्पर्क गर्न खोज्दा हुन सकिएन् ।
