राजविराज । कक्षा १० को परीक्षा दस्तुर वापत बढी रकम लिएकोबारे सामाजिक संजालमा लेख्ने विद्यार्थी कुटिएपछि राजविराजमा प्रदर्शन भइरहेको छ ।
राजविराज नगरपालिका वडा नम्बर १६ स्थित नरेन्द्र मेमोरियल जनता माविका विद्यार्थी बजार आईपुगेर प्रदर्शन गरिरहेका छन् । कक्षा १० को परीक्षा दस्तुर वापत परीक्षा नियन्त्रण कार्यालयले रु ५०० तोकेकोमा विद्यालयले रु १ हजारका दरले लिएको विद्यार्थी विशाल यादवले जानकारी दिए ।
उनका अनुसार १ हजार माग्दा आफूहरुले दिएपनि अर्धबार्षिक परीक्षा शुरु भएपछि पुनः रु ४०० मागेको थियो । यो रकम सहयोग वापत दिनुपर्ने प्रअले बताएको कुरा कक्षा १० मा अध्ययनरत विका मण्डल र रोशन साहले सामाजिक संजालमा लेखेका थिए ।
सामाजिक संजालमा लेखेको भोलिपल्ट परीक्षा दिन आएका विकाश मण्डल र रोशन साहको मोवाइल प्रअले नियन्त्रणमा लिई परीक्षा सकिएपछि कार्यालयमा लिन आउन भने ।
मोवाइल लिन जाँदा दुबैलाई प्रअ रमानन्द सुनरैत, व्यवस्थापन समितिका अध्यक्ष रितेश यादव, शिक्षिका रिता यादवका पति प्रकाश यादव र गाउँकै उमेश यादव मिलेर दुबैलाई पिटेको विद्यार्थी विशालले बताए ।
उनले हात, फलामको रड समेतले कुट्दा दुबै घाइते भएका छन् । घाइतेको गजेन्द्रनारायण सिंह अस्पतालमा उपचार भइरहेको छ ।
विशालका अनुसार प्रअ, अध्यक्ष मिलेर दुबै विद्यार्थीलाई नाङो बनाएर भिडियो समेत लिएको र कुटेको कुरा कसैलाई भने सार्वजनिक गरिदिने धम्की दिएका छन् ।
घट्नाको बिरोधमा विद्यालयका सम्पूर्ण विद्यार्थी प्रदर्शन गरिरहेका छन् । उनीहरुले केहि बेर जनआन्दोलन चोकमा यातायात समेत अबरुद्ध पारेका छन् ।
