राजविराज । सप्तरीका विद्यालयले राष्ट्रिय परीक्षा बोर्ड, परीक्षा नियन्त्रण कार्यालयले तोकेकोभन्दा बढी दस्तुर लिन नपाउने भएको छ ।
उक्त कार्यालयले कक्षा ९ को रजिष्ट्रेशन वापत रु ३०० र कक्षा १० को परीक्षा दस्तुर वापत रु ५०० तोकेको छ । सप्तरीका केहि विद्यालयले तोकिएकोभन्दा बढी शुल्क लिएको पाइएपछि यसमा कडई गरिएको छ ।
मंगलबार जिल्ला प्रशासन कार्यालयमा बसेको सरोकारबालाको बैठकले तोकिएकोभन्दा बढी शुल्क नलिने निर्णय गरेको छ । अन्य शुल्क लिनुपर्दा विद्यालय व्यवस्थापन समिति मार्फत् निर्णय गराई मात्र शुल्क लिने र सोको अनिवार्य रुपमा रसीद उपलब्ध गराउने निर्णय भएको शिक्षा विकास तथा समन्वय इकाई, सप्तरीका प्रमुख विजय मण्डलले जानकारी दिए ।
उनका अनुसार बैठकले स्थानीय तहका शिक्षा प्रमुखले पालिका उप प्रमुख÷उपाध्यक्षसँग समन्वय गरी आ–आफ्नो पालिकामा अनुगमन गर्ने निर्णय पनि गरेको छ ।
जिल्ला समन्वय समितिका प्रमुख शिबनारायण साहको अध्यक्षतामा बसेको बैठकमा प्रमुख जिल्ला अधिकारी किरण थापाले शिक्षा क्षेत्रलाई विवादमा नल्याउन आग्रह गरे ।
शिक्षक महासंघका अध्यक्ष दिनेश प्रसाद यादवले राजनीतिक चेपुवाको शिकार प्रअ र शिक्षक भएको भन्दै बिना कारण पनि तनाव भोग्नुपरिरहेको बताए ।
बैठकमा सप्तरीको १८ वटै पालिकाका शिक्षा प्रमुख, प्याव्सन तथा एन प्याव्सनका अध्यक्ष, संचारकर्मीको उपस्थिति थियो ।
