राजविराज । एक न एक दिन सबलाई मृत्युवरण गर्नैपर्ने हुन्छ । तर कतिपय यस्ता मृत्यु हुन्छ जसले चर्चा पाउँछ । यस्तै मृत्युको चर्चा पाउनेमा एक दम्पति छन् ।
महोत्तरीको लोहारपट्टी नगरपालिका वडा नम्बर ३ महदैया निवासी राधे सहनी र उनकी पत्नी अस्मिता सहनीको केहि घण्टाको फरकमा ज्यान गएको छ ।
२२ बर्षीय राधेको सोमबार बिहान मृत्यु भयो भने उनकी पत्नी अस्मिताको सोमबारै राति ११ बजे ज्यान गयो ।
प्रहरीका अनुसार राधे धनुषाको क्षिरेश्वरनाथ नगरपालिका वडा नम्बर ३ पकडियास्थित गहुँ खेतमा मृत भेटिएका थिए । अस्मिता भने गम्भीर घाइते अवस्थामा फेला परेकी थिइन् ।
अस्मितालाई उपचारका निम्ति प्रादेशिक अस्पताल लगिएकोमा सोही क्रममा ज्यान गएको छ ।
यी दुबै चार महिनाअघि मात्रै प्रेम विवाह गरी क्षिरेश्वरनाथ नगरपालिकाको महेन्द्रनगरमा डेरा लिई बस्दै आएका थिए ।
प्रहरीका अनुसार घट्नास्थलामा मोटरसाइकल दुर्घटनाग्रस्त अवस्थामा भेटिएका छन् । दुबैको दुर्घटनामै मृत्यु भएको आशंका गरिएपनि यस सम्बन्धमा अन्य अनुसन्धान भइरहेको प्रहरीले जनाएको छ ।
