शैलेन्द्र कुमार सिंह
राजविराज । कर्मचारी हाजिरी गरेर कार्यालयमा नबस्ने प्रबृत्तिबारे ध्यानाकर्षण गराउँदा पनि चासो नलिएको भन्दै राजविराज नगरपालिकाका वडा सदस्यले धर्ना शुरु गरेका छन् ।
२२ पुसमा कर्मचारी कार्यालयमा नबस्ने गरेकोसहित सात बुँदे माग राखेर वडा सदस्यहरुले राजविराज नगरपालिकाका कार्यबाहक प्रमुख इसरत परबिनलाई ज्ञापन बुझाएका थिए । एक साताको अल्टिमेटम दिएर ज्ञापन बुझाएपनि कुनै चासो नलिएपछि २९ पुसमा संघर्ष समिति बनाएर वडा सदस्यहरु आन्दोलनको घोषणा गरेका छन् ।
घोषित आन्दोलन अनुसार बिहीबार नगरपालिका कार्यालयमा एक घण्टा धर्ना दिइएको संघर्ष समितिका संयोजक वडा नम्बर ७ का सदस्य रमानन्द देवले जानकारी दिए ।
उनका अनुसार बिहीबार १ बजेदेखि २ बजेसम्म धर्ना दिइएको छ ।
कार्यालयमा कर्मचारी नबस्दा आम जनता सेवा सुविधाको लागि भौंतारिनुपर्ने अवस्था आएकाले शाखामा कर्मचारी कार्यालय समय अवधिभर अनिवार्य बस्नुपर्ने व्यवस्था मिलाउनुपर्ने माग उनीहरुले गरेको छ ।
वडा सदस्यहरुले बर्षाैदेखि आफ्नै जग्गा बेचबिखन गर्न नपाउनुका साथै ऋण समेत उठाउन नपाएका हजारौं घर परिवार बिटौरी जग्गाबालालाई अबिलम्ब जग्गाधनी पूर्जा उपलब्ध गराउन पहल गर्नुपर्ने र तत्काल उपलब्ध गराउन नसकिए जग्गाबालाले आफ्नो जग्गा धितो राखी ऋण पाउने व्यवस्था मिलाउन पहल गर्नुपर्ने माग गरेका छन् ।
यस्तै,नगरसभाबाट पारित यस बर्षका योजनाको एकसाताभित्र सम्झौता गरी कार्य सुचारु गर्नुपर्ने, नगर क्षेत्रभित्र सरसफाईलाई उच्च प्राथमिकता राखी सोको स्थायी व्यवस्थापनका लागि थप सबारी साधन, नगर क्षेत्रको चारैतर्फ रहेका भलुवाही ढल निकासको व्यवस्थापन र डम्पिङ साइटको अबिलम्ब व्यवस्थापन गर्नुपर्नेसहितका माग उनीहरुले राखेका छन् ।
